ہانگ کانگ کو شکست دے کر بھارت بھی سپر فور میں پہنچ گیا

دوبئی//
ایشیا کپ 2022 میں گروپ اے کے میچ میں بھارت نے ہانگ کانگ کو باآسانی 40 رنز سے شکست دے کر سپر فور مرحلے کے لیے کوالیفائی کرلیا۔
بھارت کی جانب سے دیے گئے 193 رنز کے ہدف کے تعاقب میں ہانگ کانگ کی ٹیم مقررہ 20 اوورز میں 152 رنز ہی بناسکی۔
دبئی کرکٹ اسٹیڈیم میں کھیلے جانے والے اس میچ میں ہانگ کانگ نے ٹاس جیت کر بھارت کو پہلے بیٹنگ کرنے کی دعوت دی تھی۔
بھارت کے روہیت شرما نے 21 رنز جبکہ کے ایل راہول نے 36 رنز کی اننگز کھیلی۔
دو وکٹیں گنوانے کے بعد ہانگ کانگ بھارت کا کوئی کھلاڑی آؤٹ نہ کرسکا، جہاں ویرات کوہلی نے 59 اور سوریاکمار یادو نے صرف 26 گیندوں پر 68 رنز کی دھواں دار اننگز کھیل کر دو وکٹوں کے نقصان پر 192 رنز بناڈالے۔
خیال رہے کہ گروپ میں ایک فتح کے ساتھ بھارت سرفہرست ہے جبکہ ہانگ کانگ اپنا پہلا میچ کھیل رہی ہے۔
ٹاس کے موقع پر ہانگ کانگ کے کپتان نزاکت خان کا کہنا تھا کہ عمان کے اندر ہم اچھے چیزرز ثابت ہوئے تھے اور آج بھی یہی کرنا چاہتے ہیں۔
انہوں نے گزشتہ ایونٹ میں بھارت کے ساتھ اپنے میچ کے حوالے سے بات کرتے ہوئے کہا کہ گزشتہ ایونٹ میں بھی بھارت کے خلاف میچ اچھا میچ تھا اور ہم وہی دوبارہ دہرانا چاہتے ہیں۔ گزشتہ میچ میں غلطیاں کیں، لیکن آج بہتر کرنا چاہتے ہیں۔
بھارتی ٹیم کے کپتان روہیت شرما کا کہنا تھا کہ ہم بھی پہلے گیندبازی کرتے، میرا ماننا ہے کہ یہ اچھی وکٹ ہے اور ہمیں اچھا اسکور کرنے کی ضرورت ہے۔
انہوں نے یہ بھی کہا کہ ہم حریف ٹیم کو دیکھنا نہیں چاہتے، اپنی مثبت کرکٹ کھیلنا چاہتے ہیں۔
روہیت شرما نے بتایا کہ آج کے میچ میں ہاردیک پانڈیا کو آرام کروا کے ان کی جگہ پر ریشبھ پنت کو ٹیم میں شامل کیا گیا ہے۔
ہانگ کانگ کی ٹیم کپتان نزاکت خان، بابر حیات، یاسین مرتضیٰ، کنچت شاہ، اسکاٹ میک کیشین، ہارون ارشد، عزیز خان، ذیشان علی، احسان خان، ایوش شکلا اور محمد غضنفر پر مشتمل ہے۔
روہیت شرما کی قیادت میں بھارتی ٹیم کے ایل راہول، ویرات کوہلی، سریا کمار یادو، ریشبھ پنت، رویندرا جڈیجا، دنیش کارتھک، بھونیشور کمار، اویشن خان، یوزویندرا چہل اور ارشدیپ سنگھ کے ساتھ میدان میں اتری ہے۔
ہندوستان کے اسٹار بلے باز وراٹ کوہلی نے بدھ کو 2022 ایشیا کپ میں ہانگ کانگ کے خلاف نصف سنچری بنا کر ٹی 20 انٹرنیشنل میں سب سے زیادہ ففٹی بنانے والے روہت شرما کی برابری کرلی ہے۔
وراٹ نے ہانگ کانگ کے خلاف 44 گیندوں میں ایک چوکے اور تین چھکوں کی مدد سے 59 رنز کی ناٹ آؤٹ اننگز کھیلی۔ یہ ٹی ٹوئنٹی انٹرنیشنل میں ویراٹ کی 31 ویں ففٹی تھی، جب کہ روہت نے اس فارمیٹ میں 27 نصف سنچریاں اور چار سنچریاں اسکور کی ہیں۔
روہت اور کوہلی کے علاوہ کوئی بھی بلے باز ٹی۔ٹوئنٹی انٹرنیشنل میں 30 بار پچاس رنز کا ہندسہ نہیں چھو سکا ہے۔ دوسری جانب 15 سے زائد مرتبہ 50 رنز بنانے والے کھلاڑی کم از کم ایک سنچری بنا چکے ہیں، جب کہ کوہلی ابھی تک اپنی پہلی ٹی ٹوئنٹی انٹرنیشنل سنچری کا انتظار کر رہے ہیں۔