جنگجوئیت کا صفایا:آخری منصوبہ بندحملے کی ضرورت:دلباغ

سرینگر//
جموں کشمیرکے ڈائریکٹر جنرل پولیس(ڈی جی پی)‘دلباغ سنگھ کا کہنا ہے کہ جموںکشمیر سے ملی ٹینسی کے مکمل صفایا کو یقینی بنانے کیلئے منصوبہ بند آخری حملے کی ضرورت ہے۔
پولیس سربراہ نے ملی ٹینسی کے ایکو سسٹم اور اْنہیں آکسیجن فراہم کرنے والوں کو تباہ کرنے کی خاطر ہر ممکن کوشش کرنے پر زور دیا۔
ان باتوں کا اظہار دلباغ نے جموں میں ایک اعلیٰ سطحی سیکورٹی میٹنگ کے دوران کیا۔
پولیس چیف نے کہاکہ جموں وکشمیر میں ملی ٹینسی کے مکمل صفایا کو یقینی بنانے کیلئے منصوبہ بند آخری حملے کی ضرورت ہے تاکہ جموں وکشمیر میں پوری طرح سے امن قائم ہو سکے۔انہوں نے بتایا کہ دہشت گردی کے ایکو سسٹم کو بھی پوری طرح سے تباہ کرنے کی ضرورت ہے اور جو اس کو آکسیجن فراہم کر رہے ہیں اْن کے ساتھ بھی سختی سے نپٹنے کی ضرورت ہے۔
ڈائریکٹر جنرل پولیس نے آفیسران کو ہدایت دی کہ ملی ٹینٹوں کی سرگرمیوں کو روکنے کی خاطر سرحدی علاقوں میں مزید چوکسی بڑھائی جائے۔انہوں نے کہا کہ فی الحال ہم نے جموںکشمیر میں سرگرم ملی ٹینٹوں کی تعداد کو کم کرنے میں کامیابی حاصل کی۔
دلباغ نے کہاکہ ہمیں جموں وکشمیر میں امن و استحکام کو مستحکم کرنے کی خاطر مزید کوششیں کرنے کی ضرورت ہے۔
ڈائریکٹر جنرل نے کہاکہ پچھلے تین برسوں کے دوران پولیس اور دیگر سیکورٹی ایجنسیوں کی مشترکہ کوششوں کے نتیجے میں جموں وکشمیر میں حالات کافی بہتر ہوئے۔انہوں نے کہا’’جموںکشمیر میں ہڑتال اور بند قصہ پارینہ بن کر رہ گئے‘‘۔
یو اے پی اے کے تحت جیلوں میں مقید ملزمان کے کیسوں کو جلد از جلد مکمل کرنے کی ضرورت پر زور دیتے ہوئے پولیس سربراہ نے کہاکہ اس ایکٹ کے تحت بند افراد کو سزا ملیں اس پر خصوصی توجہ دینے کی ضرورت ہے۔
ڈائریکٹر جنرل پولیس نے آفیسران کو ہدایت دی کہ وہ زیر التوا مقدمات کو حساسیت کی بنیاد پر کم سے کم وقت میں نمٹا نے کی سعی کریں۔انہوں نے منشیات کے خلاف جنگ کو مزید تیزتر کرنے کی ضرورت پر زور دیتے ہوئے کہاکہ اس سے نہ صرف ہماری نوجوان نسل متاثر ہو رہی ہے بلکہ منشیات کی اسمگلنگ سے دہشت گردوں کو بڑی رقم حاصل ہوتی ہے۔
دلباغ نے کہا کہ امسال سالانہ امر ناتھ یاترا خوش اسلوبی کے ساتھ اختتام کو پہنچی اور اس حوالے سے سیکورٹی فورسز نے اپنا کلیدی کردار ادا کیا۔انہوں نے بتایا کہ مختلف محازوں پر پولیس کی کامیابیوں کو سراہا جا رہا ہے تاہم ہمیں جموں وکشمیر میں امن و استحکام کی خاطر مزید کوششیں کرنا ہوں گی۔
میٹنگ میں پولیس کے سینئر آفیسران نے شرکت کی جس دوران انہوں نے پولیس چیف کو سیکورٹی کے حوالے سے کئے جارہے انتظامات کے بارے میں جانکاری فراہم کی۔