سندھو چوٹ کے باعث عالمی چمپئن شپ سے باہرہوئیں

نئی دہلی// سابق عالمی چمپئن اور ہندوستان کی ٹاپ شٹلر پسرلا وینکٹا سندھو بائیں پیرمیں اسٹریس فریکچر کی وجہ سے ورلڈ بیڈمنٹن چمپئن شپ سے باہر ہوگئی ہیں۔
اسپورٹ اسٹار نے ہفتہ کو جاری رپورٹ میں سندھو کے والد پی وی رمن کے حوالے سے کہا کہ دوبارکی اولمپک میڈلسٹ کوبرمنگھم کامن ویلتھ گیمز کے کوارٹر فائنل میں چوٹ لگی تھی۔
انہوں نے بتایا کہ سندھو نے چوٹ کے باوجود سیمی فائنل میچ کھیلا اور آخر کار دولت مشترکہ کا طلائی تمغہ جیتا۔
27 سالہ سندھو نے عالمی چیمپئن شپ میں ایک طلائی سمیت پانچ تمغے جیتے ہیں۔ اب انہیں مکمل طورپر صحت یاب ہونے تک نگرانی میں رکھا جائے گا۔
رمن نے اسپورٹس اسٹار سے بات کرتے ہوئے کہا کہ سنگاپور اوپن اور کامن ویلتھ گیمز جیتنے کے بعد عالمی چیمپئن شپ سے محروم ہونا مایوس کن ہے لیکن یہ سب چیزیں ہمارے ہاتھ میں نہیں ہیں۔
انہوں نے مزید کہا کہ ہماری توجہ ان کی صحت یابی پر مرکوز رہے گی اور ہم اکتوبر میں ڈنمارک اور پیرس اوپن کو نشانہ بنائیں گے۔
قابل ذکر ہے کہ سندھو نے حال ہی میں خواتین کے سنگلز میں اپنا پہلا کامن ویلتھ گولڈ جیتا تھا۔ اس سے قبل انہوں نے 2014 (کانسہ) اور 2018 (سلور) میں بھی تمغے جیتے تھے۔