۱۶۳ طلائی تمغوں میں سے۱۳۰ طالبات کے نام، خواتین کی کامیابی آنے والی نسلوں کیلئے اعتماد کی علامت
جموں؍۱۴ نومبر
لیفٹیننٹ گورنر منوج سنہا نے ہفتہ کے روز کلسٹر یونیورسٹی جموں کی پہلی تقریبِ تقسیمِ اسناد سے خطاب کرتے ہوئے نوجوانوں پر زور دیا کہ وہ ہندوستان کی نوجوان آبادی کو محض آبادیاتی فائدے کے بجائے ایک ’’آبادیاتی ذمہ داری‘‘ کے طور پر دیکھیں۔
سنہا نے کہا کہ مصنوعی ذہانت (اے آئی) کام کی رفتار میں اضافہ کرے گی، تاہم اسے درست سمت فراہم کرنا انسانوں کی ذمہ داری ہوگی۔ ان کے مطابق ٹیکنالوجی ہمیں بتاتی ہے کہ ہم کیا کرسکتے ہیں، جبکہ علومِ انسانی ہمیں سکھاتے ہیں کہ ہمیں کیا کرنا چاہیے۔
تقریب سے خطاب کرتے ہوئے لیفٹیننٹ گورنر نے کہا کہ مصنوعی ذہانت کی ترقی کو تہذیبی اقدار اور جوابدہی کے اصولوں کے تابع ہونا چاہیے اور اس کا مقصد محض منافع اور پیداواری صلاحیت میں اضافہ نہیں بلکہ انسانی فلاح و بہبود ہونا چاہیے۔انہوں نے فارغ التحصیل طلبہ پر زور دیا کہ وہ صرف مواقع تلاش کرنے کے بجائے خود مواقع پیدا کریں۔
تقریب میں تمل ناڈو کے گورنر راجندر وشوناتھ آرلیکر نے بھی شرکت کی۔
لیفٹیننٹ گورنر نے کلسٹر یونیورسٹی جموں کی پہلی تقریب میں سند حاصل کرنے والے طلبہ، طلائی تمغے حاصل کرنے والوں اور ان کے والدین کو مبارکباد پیش کی۔ انہوں نے خصوصی طور پر طالبات کی کامیابی کو سراہتے ہوئے کہا کہ مجموعی طور پر۱۶۳طلائی تمغوں میں سے۱۳۰ طالبات نے حاصل کیے ہیں۔
سنہا نے کہا کہ جب بیٹیوں کو مواقع فراہم کیے جاتے ہیں تو وہ نہ صرف کامیابیاں حاصل کرتی ہیں بلکہ کامیابی کے مفہوم کو بھی نئی جہت عطا کرتی ہیں۔ ان کے مطابق طالبات کے یہ طلائی تمغے آنے والی نسلوں کے لیے اعتماد کی علامت ہیں۔
ایل جی نے کہا، ’’جموں و کشمیر کے اعلیٰ تعلیمی اداروں میں بیٹیاں اپنی کامیابیوں کے ذریعے نئی تاریخ رقم کررہی ہیں۔‘‘انہوں نے جموں و کشمیر کے علمی اور فکری ورثے کا ذکر کرتے ہوئے کہا کہ راج ترنگنی کے مصنف مہارشی کلہن، مہارشی ابھینو گپت اور صوفی شاعرہ یوگنی لل دید اور شیخ العالم نے مذہبی ہم آہنگی اور سچائی کی تلاش کو فروغ دیا۔ انہوں نے کہا کہ آج فارغ التحصیل ہونے والے طلبہ ایک ہزار سال سے زیادہ قدیم علمی روایت کو آگے بڑھا رہے ہیں۔
لیفٹیننٹ گورنر نے کہا کہ ہندوستان اس وقت تبدیلی کے ایک تاریخی دور سے گزر رہا ہے اور۲۰۴۷ تک ترقی یافتہ ملک بننے کے قومی عزم کے ساتھ دنیا کی بڑی اور تیزی سے ترقی کرنے والی معیشتوں میں شامل ہورہا ہے۔انہوں نے ملک کے ڈیجیٹل عوامی بنیادی ڈھانچے، خلائی شعبے میں غیر معمولی ترقی، تحقیق و اختراع اور کوانٹم ٹیکنالوجی، مصنوعی ذہانت، سیمی کنڈکٹرز، سبز توانائی اور بایو ٹیکنالوجی میں بڑھتی ہوئی سرمایہ کاری کا بھی ذکر کیا۔
سنہا نے کہا’’۲۰۴۷تک ترقی یافتہ ہندوستان کی تعمیر ہمارا قومی عزم ہے۔ اس وقت تک آپ میں سے بہت سے نوجوان اپنے پیشہ ورانہ کیریئر کی بلند ترین منزلوں پر ہوں گے۔ لہٰذا ترقی یافتہ ہندوستان محض آنے والی نسل کے لیے کوئی نعرہ نہیں ہوگا بلکہ یہ آپ کی زندگی کی کامیابیوں کا نچوڑ اور آپ کی سب سے بڑی جدوجہد اور حصولیابی ہوگی۔‘‘
ایل جی نے بتایا کہ ہندوستان میں اب تقریباً۲ لاکھ۲۳ ہزار اسٹارٹ اپس اور۱۳۵ یونیکورن کمپنیاں ہیں۔ انہوں نے کہا کہ ان میں سے کئی اداروں کے بانی چھوٹے شہروں سے تعلق رکھتے ہیں، جو مواقع اور کاروباری سرگرمیوں کی حقیقی جمہوری تقسیم کی عکاسی کرتا ہے۔
نوجوان آبادی سے حاصل ہونے والے آبادیاتی فائدے پر ایک نیا نقطہ نظر پیش کرتے ہوئے انہوں نے کہا کہ وہ اسے ’’آبادیاتی ذمہ داری‘‘ کہنا زیادہ پسند کریں گے۔انہوں نے کہا کہ معاشرے کو اس وقت حقیقی فائدہ پہنچے گا جب نوجوان کسانوں کو منڈیوں سے جوڑیں گے، خواتین کے خود امدادی گروپ روزگار فراہم کرنے والے اداروں میں تبدیل ہوں گے اور انجینئر دور دراز علاقوں کے لیے کم قیمت طبی آلات تیار کریں گے۔
علومِ انسانی کی اہمیت پر روشنی ڈالتے ہوئے لیفٹیننٹ گورنر نے کہا کہ ملک کی تعمیر کے لیے انجینئروں کے ساتھ مؤرخین اور سائنس دانوں کے ساتھ موسیقاروں کی بھی ضرورت ہے۔انہوں نے کہا کہ اگر ہم معاشرے کی فکری دولت اور صلاحیت کو مضبوط بنانا چاہتے ہیں تو نوجوان نسل کو غیر متزلزل حوصلے کے ساتھ جدوجہد کرنے کے لیے تیار کرنا ہوگا۔
ایل جی نے کہا، ’’بحرانوں کو مواقع میں تبدیل کریں۔ عظیم شخصیات نے بھی ایسا ہی کیا اور آج دنیا انہیں یاد کرتی ہے۔ میرا ماننا ہے کہ صلاحیت کسی مخصوص مقام کی پابند نہیں ہوتی اور عظمت کسی خاص پتے کی محتاج نہیں ہوتی۔ عظمت کے حصول کے لیے حوصلہ اور جدوجہد درکار ہوتی ہے۔‘‘
لیفٹیننٹ گورنر نے طلبہ کو انٹرن شپ کے حوالے سے تین عملی مشورے بھی دیے۔ انہوں نے کہا کہ طلبہ کو مواقع تلاش کرنے کے بجائے کسی کمپنی کے مسائل کا مکمل مطالعہ کرکے ان کا حل پیش کرنا چاہیے، اپنی صلاحیتوں کو اس قدر بہتر بنانا چاہیے کہ ان کی عدم موجودگی ٹیم کو محسوس ہو اور ایسی انٹرن شپ کا انتخاب کرنا چاہیے جہاں کچھ نیا سیکھنے کا موقع ملے۔
مصنوعی ذہانت کے حوالے سے انہوں نے کہا کہ مستقبل میں اے آئی اور انسانوں کے درمیان تعلق مسابقت کے بجائے شراکت داری پر مبنی ہوگا۔ انہوں نے کہا کہ مصنوعی ذہانت ہمارے کام کرنے کے طریقے کو تبدیل کردے گی، تاہم کام کا مقصد متعین کرنا بدستور انسانوں کی ذمہ داری رہے گا۔
ان کے مطابق مصنوعی ذہانت پرانے علم کی بنیاد پر نئے جوابات فراہم کرسکتی ہے، لیکن نئے سوالات دریافت کرنے کا حوصلہ انسانوں ہی کے پاس رہے گا۔
سنہا نے کہا، ’’مصنوعی ذہانت کے پاس رفتار اور اعداد و شمار ہوں گے، لیکن سمت، ہمدردی اور نئے سوالات اٹھانے کا حوصلہ انسان فراہم کریں گے۔ اے آئی کی رہنمائی تہذیبی اصولوں، اقدار اور جوابدہی کے تحت ہونی چاہیے اور اس کی ترقی کی بنیاد انسانی فلاح و بہبود ہونی چاہیے، نہ کہ صرف منافع اور پیداواری صلاحیت۔‘‘
اس موقع پر لیفٹیننٹ گورنر نے طلبہ کو پانچ عہد کرنے کی تلقین بھی کی۔ ان میں مسلسل سیکھنے کا عمل جاری رکھنا، مواقع پیدا کرنا، دیانتداری اور اخلاقیات کو برقرار رکھنا، اپنے بعد آنے والوں کی مدد کرنا اور عملی اقدامات کے ذریعے ملک سے محبت کا اظہار کرنا شامل ہیں۔
ایل جی نے کہا، ’’آپ کی ڈگری آپ کے سفر کا اختتام نہیں بلکہ ایک نئے سفر کا آغاز ہے۔ آج کی مہارتیں ممکن ہے دس سال بعد غیر متعلقہ ہوجائیں، لیکن مسلسل سیکھنے کی عادت کبھی غیر متعلقہ نہیں ہوگی۔ اس لیے حصولِ علم کو اپنی زندگی کا مستقل حصہ بنائیں۔‘‘
سنہا نے مزید کہا کہ کردار کے بغیر علم بے معنی ہے۔ طلبہ کو صرف نمایاں پوزیشن حاصل کرنے کا ہدف نہیں رکھنا چاہیے بلکہ ایسے افراد بننا چاہیے جن میں سچ بولنے، درست کام کرنے اور ہر انسان کے ساتھ عزت و احترام سے پیش آنے کا حوصلہ ہو۔
لیفٹیننٹ گورنر نے طلبہ سے کہا کہ وہ ہمت کے ساتھ آگے بڑھیں، اپنے دلوں میں ہمدردی اور حساسیت کو جگہ دیں اور علم کی روشنی لے کر زندگی کے نئے سفر کا آغاز کریں۔انہوں نے کہا کہ مستقبل میں ٹیکنالوجی کا دائرہ مزید وسیع ہوگا، تاہم اس مستقبل کو نئی معنویت دینے کی ذمہ داری انسانی ذہانت اور نوجوان نسل پر عائد ہوگی۔
۔۔۔۔۔۔۔(ڈی آئی پی آر)
