سرینگر؍۱۴نومبر
پاکستان نے اعلان کیا ہے کہ وہ اپنے وزیر برائے موسمیاتی تبدیلی اور ماحولیاتی رابطہ کاری مصدق مسعود ملک کو شنگھائی تعاون تنظیم (ایس سی او) کے تہذیبی مکالمے کے فورم میں شرکت کے لیے نئی دہلی بھیج رہا ہے۔ یہ فورم۲۰ سے۲۲ نومبر تک دہلی میں منعقد ہوگا۔
یہ اعلان مرکزی وزیر ثقافت گجیندر سنگھ شیخاوت کے اس بیان کے ایک روز بعد سامنے آیا ہے جس میں انہوں نے جمعہ کے روز امید ظاہر کی تھی کہ پاکستان آنے والے دنوں میں اپنی شرکت کی تصدیق کرے گا۔
اجلاس میں شرکت کے فیصلے کا اعلان کرتے ہوئے پاکستان کی وزارت خارجہ نے ہفتہ کے روز کہا، ’’حکومت پاکستان نے ڈاکٹر مصدق مسعود ملک، وفاقی وزیر برائے موسمیاتی تبدیلی اور ماحولیاتی رابطہ کاری کو۲۰ سے۲۲ نومبر۲۰۲۶ تک دہلی میں منعقد ہونے والے ایس سی او تہذیبی مکالمے میں پاکستان کی نمائندگی کے لیے نامزد کیا ہے۔‘‘
پاکستانی وزارت خارجہ نے کہا کہ اس تقریب میں ایس سی او کے رکن ممالک کے نمائندے تہذیبی مکالمے اور ثقافتی تفہیم سے متعلق امور پر تبادلہ خیال کے لیے جمع ہوں گے۔
بیان میں مزید کہا گیا کہ ’’حکومت پاکستان باہمی احترام کے جذبے کے تحت ایس سی او کے دائرہ کار میں تہذیبوں کے درمیان مکالمے کو فروغ دینے اور عوامی سطح پر رابطوں کو مضبوط بنانے کے لیے پُرعزم ہے۔‘‘
ہندوستان نے اس فورم میں شرکت کے لیے پاکستان کے وزیر برائے ثقافت اور قومی ورثہ اورنگزیب خان کھیچی کو دعوت دی تھی۔
مئی۲۰۲۵ میں آپریشن سندور کے دوران ہندوستان اور پاکستان کے درمیان فوجی تصادم کے بعد کسی سینئر پاکستانی وزیر کو ہندوستان کی جانب سے اس نوعیت کی یہ پہلی دعوت دی گئی ہے۔ ہندوستانی حکومت کے مطابق آپریشن سندور تاحال جاری ہے۔
پاکستانی وزیر کی اس اجلاس میں شرکت کے ساتھ ہی یہ مئی۲۰۲۳ میں گوا میں منعقدہ ایس سی او وزرائے خارجہ اجلاس کے بعد پہلا موقع ہوگا جب کسی پاکستانی وزیر نے ہندوستان میں منعقد ہونے والے ایس سی او کے اجلاس میں شرکت کی ہو۔ اس وقت پاکستان کے وزیر خارجہ بلاول بھٹو زرداری نے ہندوستان کا دورہ کیا تھا۔
پاکستانی وزیر کو دی گئی دعوت نئی دہلی کی اس ذمہ داری کا حصہ ہے جس کے تحت ایس سی او کے تمام رکن ممالک کے نمائندوں کو مدعو کرنا ضروری ہے، کیونکہ ہندوستان نے ایس سی او تہذیبی مکالمے کے فورم کی میزبانی کی پیشکش کی تھی۔ پاکستان آئندہ سال ایس سی او سربراہان کے اجلاس کی میزبانی کرنے والا ہے۔
اس سے قبل چین، قزاقستان، ایران، تاجکستان، ازبکستان، بیلاروس، آذربائیجان، آرمینیا، بحرین، نیپال، سعودی عرب، ترکیہ اور سری لنکا سمیت کئی ممالک نے آئندہ ایس سی او تہذیبی مکالمے کے فورم میں اپنی شرکت کی تصدیق کی ہے۔ ہندوستان اس فورم کی میزبانی تاریخی پرانا قلعہ میں کرے گا۔
وزیر ثقافت کے مطابق وزیر اعظم۲۰ نومبر کو افتتاحی تقریب میں شرکت کریں گے، جبکہ اس کے بعد کے دنوں میں چار اہم اجلاس منعقد ہوں گے۔ ان اجلاسوں کے موضوعات میں تہذیبی اور ثقافتی اظہار، فن و تعمیرات، زبان، ادب اور قدیم مخطوطات شامل ہوں گے۔
شیخاوت نے کہا کہ ہندوستان کا مقصد یہ یقینی بنانا ہے کہ ایس سی او محض جغرافیائی سیاسی اور اقتصادی پلیٹ فارم تک محدود نہ رہے بلکہ مشترکہ تہذیبی ورثے اور انسانی اقدار کے فروغ کا فورم بھی بنے۔ انہوں نے کہا کہ ثقافت میں مختلف ممالک اور تہذیبوں کے درمیان مکالمے کا آغاز کرنے اور اعتماد کے پل تعمیر کرنے کی صلاحیت موجود ہے۔
اس فورم کی تجویز پہلی مرتبہ وزیر اعظم نریندر مودی نے ستمبر۲۰۲۵میں تیانجن میں منعقدہ ایس سی او سربراہان مملکت کی کونسل کے اجلاس کے دوران پیش کی تھی۔ وزیر دفاع راجناتھ سنگھ نے۲۰؍اکتوبر۲۰۲۶کو تاجکستان کے دارالحکومت دوشنبہ میں ایس سی او سربراہان حکومت کی۲۵ ویں کونسل کے اجلاس سے خطاب کرتے ہوئے باضابطہ طور پر اعلان کیا تھا کہ ہندوستان اس تقریب کی میزبانی کرے گا۔
ہندوستان اور پاکستان کے درمیان رابطوں کا نیا سلسلہ گزشتہ ماہ ایس سی او کے پلیٹ فارم کے تحت شروع ہوا تھا۔
ستمبر کے آخری ہفتے میں آپریشن سندور کے بعد پہلی مرتبہ ایک ہندوستانی وفد نے پاکستان کا دورہ کیا تھا۔ اس موقع پر ایک سینئر ہندوستانی عہدیدار نے اسلام آباد کا دورہ کرتے ہوئے ’’رابطہ کاری، علاقائی روابط، راہداری اور تجارت‘‘ سے متعلق امور اٹھائے تھے۔
۔۔۔۔۔(ویب ڈیسک)
