نئی دہلی؍۱۴نومبر
راؤز ایونیو عدالت میں ہفتہ کے روز لال قلعہ دھماکہ کیس کے ملزمان مزمل شکیل اور شاہین سعید کی جانب سے الزامات عائد کرنے کے معاملے پر دلائل سنے گئے۔
ان دونوں کو دہلی کے لال قلعہ دھماکے کی سازش کے سلسلے میں گرفتار کیا گیا ہے۔۱۰ نومبر۲۰۲۵ کو لال قلعہ کے قریب ایک کار میں دھماکہ کیا گیا تھا، جس کے نتیجے میں متعدد افراد ہلاک اور کئی دیگر زخمی ہوئے تھے۔
دفاعی وکیل نے عدالت میں مؤقف اختیار کیا کہ ان دونوں ملزمان کا دھماکے میں استعمال ہونے والی گاڑی کی خریداری سے کوئی تعلق نہیں ہے۔ دیگر ملزمان کے ساتھ ان کی کسی قسم کی کوئی بات چیت یا رابطہ بھی نہیں ہوا ہے۔
قومی تحقیقاتی ایجنسی (این آئی اے) نے۱۱ ملزمان کے خلاف فردِ جرم داخل کی تھی۔ ان میں سے ایک ملزم عمر النبی دھماکے میں ہلاک ہوگیا تھا۔ بعد ازاں مزید دو ملزمان کے خلاف ضمنی فردِ جرم بھی داخل کی گئی۔
خصوصی جج (این آئی اے) پرشانت شرما نے مزمل شکیل اور شاہین سعید کی جانب سے پیش کردہ دلائل سنے۔ یہ سماعت بند کمرے میں منعقد ہوئی۔
عدالت نے اس معاملے میں ایک اور ملزم شعیب کی جانب سے دلائل سننے کے لیے۱۷ نومبر کی تاریخ مقرر کی ہے۔
ملزمان کی جانب سے ایڈووکیٹ ایم ایس خان کے ہمراہ ایڈووکیٹ راہول سہانی اور ذاہبی تہامی عدالت میں پیش ہوئے۔
این آئی اے کی جانب سے سینئر ایڈووکیٹ مادھو کھورانہ (خصوصی سرکاری وکیل) پیش ہوئے۔ انہوں نے مؤقف اختیار کیا کہ تمام ملزمان کے خلاف الزامات عائد کرنے کے لیے کافی مواد موجود ہے اور ملزمان کے درمیان سازش کے شواہد بھی دستیاب ہیں۔
الزام ہے کہ عمر النبی اس وقت خوف و ہراس میں مبتلا ہوگیا تھا جب اسے ہریانہ کے فریدآباد میں واقع الفلاح یونیورسٹی سے اپنے ساتھیوں کی گرفتاری کی اطلاع ملی۔
دفاعی وکیل نے کہا کہ دونوں ملزمان کا۱۰ نومبر۲۰۲۵کو پیش آئے دھماکے کی سازش سے کوئی تعلق نہیں ہے، کیونکہ انہیں بالترتیب۲۹؍اکتوبر اور۹ نومبر کو گرفتار کیا گیا تھا۔
مزید کہا گیا کہ دھماکے میں عمر النبی کی جانب سے استعمال کی گئی گاڑی۳۰؍اکتوبر کو ہریانہ کے فریدآباد میں ایک کار ڈیلر سے خریدی گئی تھی۔ تاہم ملزم مزمل شکیل کو جموں و کشمیر پولیس نے۲۹؍ اکتوبر کو ہی ایک بڑی سازش کے معاملے میں گرفتار کرلیا تھا۔
یہ گاڑی عامر رشید کے نام پر تھی۔ ایڈووکیٹ ایم ایس خان نے مؤقف اختیار کیا کہ ملزم مزمل شکیل نے نہ تو مذکورہ گاڑی کی خریداری میں کوئی سہولت فراہم کی اور نہ ہی اس کے لیے مالی مدد دی۔ انہیں سی سی ٹی وی فوٹیج میں بھی نہیں دکھایا گیا ہے۔ ان کے مطابق سی سی ٹی وی فوٹیج میں عمر النبی، عامر رشید اور تیسرے ملزم جاصر بلال وانی نظر آرہے ہیں۔ انہوں نے مزید کہا کہ مزمل شکیل اور دیگر ملزمان کے درمیان کسی قسم کا کوئی رابطہ نہیں تھا۔
وکیل نے مزید بتایا کہ ملزم شاہین سعید کو دھماکے سے ایک روز قبل۹ نومبر کو جموں و کشمیر پولیس نے لکھنؤ سے گرفتار کیا تھا۔ انہوں نے سوال اٹھایا کہ آیا عمر النبی اور عامر رشید کو اس بات کا علم تھا کہ مزمل شکیل کو۲۹؍ اکتوبر کو گرفتار کیا جائے گا؟ دفاعی وکیل نے۱۰ نومبر کو پیش آئے دھماکے کی سازش سے ان کے تعلق پر بھی سوالات اٹھائے۔
این آئی اے نے تحقیقات مکمل کرنے کے بعد۴ جون کو عمر النبی سمیت۱۱ ملزمان کے خلاف فردِ جرم داخل کی تھی۔
۔۔۔۔۔۔(ایجنسیاں )
