اہم سڑکوں سے برف ہٹانے کا کام شروع‘سرینگر لہیہ شاہراہ بند
(ایجنسیاں )
سرینگر؍۱۳ ؍نومبر
کشمیر کے بیشتر علاقوں میں جمعہ کی صبح تک درمیانی سے شدید بارشیں ہوئیں، جبکہ وادی کے بالائی علاقوں میں تازہ برفباری ریکارڈ کی گئی۔
حکام کے مطابق مشہور سیاحتی مقامات گلمرگ اور سونہ مرگ میں رات کے دوران تازہ برفباری ہوئی۔ اس کے علاوہ گریز اور کپواڑہ کے بالائی علاقوں، زوجیلا پاس اور جنوبی کشمیر کے ضلع شوپیاں میں واقع مغل روڈ پر بھی برفباری کی اطلاعات موصول ہوئی ہیں۔
حکام نے بتایا کہ اہم سڑک رابطوں پر ٹریفک کی نقل و حرکت بحال کرنے کے لیے برف ہٹانے کا کام شروع کر دیا گیا ہے۔
ادھر وادی کے میدانی علاقوں، بشمول گرمائی دارالحکومت سرینگر میں درمیانی سے شدید بارشیں ہوئیں، جن کا سلسلہ جمعہ کی صبح تک جاری رہا۔
محکمہ موسمیات کے مطابق بارہمولہ میں۴۹ء۵ ملی میٹر، گلمرگ میں۴۰ء۶ ملی میٹر اور کپواڑہ میں۳۷ء۳ ملی میٹر بارش ریکارڈ کی گئی۔
محکمہ موسمیات نے بتایا کہ موسم میں بتدریج بہتری آنے کا امکان ہے، تاہم اگلے۲۴ گھنٹوں کے دوران بعض مقامات پر ہلکی بارش اور بالائی علاقوں میں ہلکی برفباری ہو سکتی ہے۔
محکمے کے مطابق۱۵ سے۲۱ نومبر تک موسم مجموعی طور پر خشک رہنے کا امکان ہے۔
اس دوران زوجیلا درے پر تازہ برف باری کے بعد سرینگر،لیہہ قومی شاہراہ پر ٹریفک کی آمدورفت دونوں اطراف سے معطل کر دی گئی ہے۔ اونچی جگہوں پر برف باری کے تازہ دور کے بعد، بارڈر روڈز آرگنائزیشن نے اپنی۱۲۲ روڈ کنسٹرکشن کمپنی کے ذریعے، زوجیلا سڑک پر گاڑیوں کی نقل و حرکت کے لیے قومی شاہراہ کو بحال کرنے کے لیے برف صاف کرنے کی کارروائی کا آغاز کیا ہے۔
حکام نے بتایا کہ اگلے احکامات تک کسی بھی گاڑی کو شاہراہ کے دونوں طرف سے جانے کی اجازت نہیں دی جائے گی ۔ یہ فیصلہ موجودہ موسمی حالات اور پھسلن کے چلتے مسافروں کی حفاظت کو یقینی بنانے کے لیے کیا گیا ہے۔ بی آر او کی ٹیمیں برف کو صاف کرنے اور سڑک کو ٹریفک کے لیے محفوظ بنانے کے لیے کام کر رہے ہیں۔
مسافروں اور ٹرانسپورٹروں کو مشورہ دیا گیا ہے کہ وہ سرینگر،لیہہ قومی شاہراہ پر اس وقت تک سفر کرنے سے گریز کریں جب تک کہ حکام کی طرف سے اگلی ٹریفک ایڈوائزری جاری نہیں کی جاتی۔ ٹریفک کی بحالی کے حوالے سے مزید اپ ڈیٹس کا انتظار کریں۔
۔۔۔۔۔۔
