(ایجنسیاں )
جموں؍۱۳ نومبر
جموں و کشمیر کے ضلع سانبہ میں دو کم عمر لڑکیوں کے اغوا اور عصمت دری کے الگ الگ واقعات میں ملوث دو ملزمان کو تقریباً ایک سال تک گرفتاری سے بچنے کے بعد جمعہ کو گرفتار کر لیا گیا۔
پولیس کے مطابق گرفتار ملزمان کی شناخت مدھیہ پردیش کے کیشَو اہروار اور جموں و کشمیر کے ضلع رام بن سے تعلق رکھنے والے پیار چند کے طور پر ہوئی ہے۔ دونوں کو ضلع سانبہ کے وجے پور اور رام گڑھ علاقوں سے گرفتار کیا گیا۔
ایک پولیس افسر نے بتایا کہ پولیس ٹیم نے کیشَو اہروار کو گرفتار کرنے میں کامیابی حاصل کی، جس کے خلاف گزشتہ سال بھارتیہ نیائے سنہتا (بی این ایس) کی مختلف دفعات اور بچوں کو جنسی جرائم سے تحفظ فراہم کرنے سے متعلق قانون (پوسکو) کے تحت مقدمہ درج کیا گیا تھا۔
پولیس افسر نے بتایا کہ اس معاملے میں ایک کم عمر لڑکی کے اغوا اور اس کے ساتھ جنسی زیادتی کے الزامات شامل ہیں۔
پولیس افسر کے مطابق دوسرے ملزم پیار چند کو بھی ایک کم عمر لڑکی کے اغوا اور عصمت دری کے الزام میں مطلوب تھا، جسے پولیس کی ایک دوسری ٹیم نے رام گڑھ سے گرفتار کیا۔
انہوں نے بتایا کہ دونوں ملزمان کے خلاف ان کی غیر موجودگی میں عدالتی کارروائی شروع کرنے کے اقدامات بھی کیے گئے تھے۔ گرفتاری کے بعد دونوں کو مقامی عدالت میں پیش کیا گیا، جہاں سے انہیں ضلع جیل کٹھوعہ بھیج دیا گیا۔
