نئی دہلی؍۹نومبر
کینسر کے علاج میں استعمال ہونے والی۱۳۶۴؍ادویات کی زیادہ سے زیادہ خوردہ قیمتوں (ایم آر پی) میں نظرثانی پیر سے نافذ العمل ہوگئی ہے۔
اس اقدام سے صارفین کو سالانہ تقریباً۳۵۴۰ کرووڑ اور ۳۸ لاکھ روپے کی بچت ہونے کا اندازہ لگایا گیا ہے۔ یہ اطلاع ایک سرکاری بیان میں دی گئی ہے۔
محکمہ ادویہ کے تحت کام کرنے والی نیشنل فارماسیوٹیکل پرائسنگ اتھارٹی (این پی پی اے) نے۱۳۷ کینسر مخالف ادویات کی زیادہ سے زیادہ خوردہ قیمتوں پر تجارتی منافع کی حد مقرر کی ہے۔ یہ فیصلہ ڈائریکٹوریٹ جنرل آف ہیلتھ سروسز (ڈی جی ایچ ایس)، وزارت صحت و خاندانی بہبود کی جانب سے تشکیل دی گئی ماہرین کی کمیٹی کی۱۷؍ اکتوبر۲۰۲۶کو پیش کردہ سفارشات کی بنیاد پر لیا گیا ہے۔
وزارت کے مطابق۸نومبر۲۰۲۶تک۸۵؍ دوا ساز کمپنیوں نے۱۲۱؍ادویات کے تحت آنے والی کینسر کی۱۳۶۴ مختلف ادویاتی مصنوعات کی نظرثانی شدہ خوردہ قیمتوں کی تفصیلات فراہم کی ہیں۔
وزارت کیمیکل و کھاد کے محکمہ ادویہ کی جانب سے جاری بیان کے مطابق۶۷۹ برانڈز کی قیمتوں میں۵۰ فیصد سے زیادہ کمی ریکارڈ کی گئی ہے، جبکہ سب سے زیادہ قیمت میں۹۶ء۴۵فیصد تک تخفیف کی گئی ہے۔
وزارت نے واضح کیا ہے کہ کوئی بھی کیمسٹ یا اسپتال کی فارمیسی نظرثانی شدہ زیادہ سے زیادہ خوردہ قیمت سے زائد رقم وصول نہیں کرسکتی۔
بیان میں کہا گیا ہے کہ صارفین ادویات کے پیکٹ پر درج نئی قیمت، ’فارما صحیح دام‘ موبائل ایپلی کیشن یا این پی پی اے کی سرکاری ویب سائٹ (nppa.gov.in) کے ذریعے ادویات کی قیمتوں کی تصدیق کرسکتے ہیں۔
وزارت نے مزید بتایا کہ اگر کسی کیمسٹ یا اسپتال کی فارمیسی کی جانب سے مقررہ قیمت سے زیادہ رقم وصول کی جاتی ہے یا قیمتوں سے متعلق کوئی دوسری شکایت ہو تو صارفین ’فارما جن سما دھان‘ پورٹل کے ذریعے شکایت درج کرا سکتے ہیں۔
۔۔۔۔۔۔۔(ایجنسیاں )
