سرینگر؍۳۰؍اکتوبر
لیفٹیننٹ گورنر منوج سنہا نے جمعہ کو ڈپٹی کمشنروں، سینئر سپرنٹنڈنٹس آف پولیس اور دیگر اعلیٰ افسران کے ساتھ ایک اعلیٰ سطحی اجلاس کی صدارت کرتے ہوئے کشمیر ڈویژن کی سلامتی صورتحال کا جائزہ لیا۔
اجلاس میں آپریشنل تیاریوں، سلامتی حکمت عملیوں اور کشمیر ڈویژن میں پُرامن ماحول برقرار رکھنے کے لیے مستقبل کے لائحہ عمل پر غور کیا گیا۔
لیفٹیننٹ گورنر نے افسران کو دہشت گرد نیٹ ورکس کے خلاف مسلسل اور بھرپور کارروائیاں جاری رکھنے کی ہدایت دی۔ انہوں نے دراندازی کی روک تھام کے نظام کو مزید سخت بنانے اور انسدادِ دہشت گردی کارروائیوں کے دوران ضلعی انتظامیہ، جموں و کشمیر پولیس، فوج اور مرکزی مسلح پولیس فورسز کے درمیان قریبی تال میل یقینی بنانے پر زور دیا۔
سنہا نے ڈپٹی کمشنروں اور ایس ایس پیز کو انتظامیہ کے اندر موجود ملک دشمن عناصر پر کڑی نظر رکھنے اور انتہا پسندی کے رجحان کا مقابلہ کرنے کے لیے کوششوں کو ترجیح دینے کی ہدایت دی۔ لیفٹیننٹ گورنر نے منشیات کی اسمگلنگ میں ملوث دہشت گردوں اور دہشت گردی کی معاونت کرنے والے نظام سے وابستہ افراد کی جائیدادیں منسلک کرنے کے معاملات کا ماہانہ جائزہ لینے کی بھی ہدایت دی۔
ایل جی نے کہا کہ منشیات کے ذریعے دہشت گردی کو فروغ دینے والے عناصر کے خلاف کارروائیاں بلا تعطل جاری رہنی چاہئیں۔ اس کے ساتھ منشیات کے اسمگلروں اور فروخت کرنے والوں کے خلاف بھی مسلسل کارروائیاں کی جائیں تاکہ منشیات سے پاک جموں و کشمیر کا ہدف حاصل کیا جا سکے۔
عوامی شکایات کے فوری ازالے پر زور دیتے ہوئے لیفٹیننٹ گورنر نے کہا کہ شہریوں، پولیس اور انتظامیہ کے درمیان مضبوط رابطہ قائم کرنا انتہائی اہم ہے۔
سنہا نے کہا، ’’کسی بھی صورت میں فرقہ وارانہ ہم آہنگی اور امن و قانون کی صورتحال کو خراب ہونے کی اجازت نہیں دی جانی چاہیے۔ پائیدار امن اور ترقی کو یقینی بنانے کے لیے بہترین طریقۂ کار کو ادارہ جاتی شکل دینے اور ضلعی سطح پر مربوط منصوبوں پر عمل درآمد کی ضرورت ہے۔‘‘
لیفٹیننٹ گورنر نے گمراہ کن اطلاعات کا فوری جواب دینے کے لیے ضلع سطح پر سوشل میڈیا سیل قائم کرنے کی بھی ہدایت دی۔
سرمائی موسم کے پیش نظر انہوں نے انتظامیہ کو ضروری اشیائے خوردونوش کے وافر ذخیرے اور دستیابی کو یقینی بنانے کے ساتھ برف ہٹانے کے مؤثر انتظامات کرنے کی ہدایت دی۔
اجلاس میں کشمیر ڈویژن میں جاری اہم بنیادی ڈھانچے کے منصوبوں کی پیش رفت کا بھی جائزہ لیا گیا۔
اجلاس میں چیف سیکریٹری اتل ڈلو، نامزد چیف سیکریٹری ڈاکٹر سجن سنگھ یادو، ڈائریکٹر جنرل پولیس نلن پربھات، ایڈیشنل چیف سیکریٹری محکمہ داخلہ چندرکر بھارتی، اسپیشل ڈی جی کوآرڈینیشن پولیس ہیڈکوارٹرز ایس جے ایم گلانی، اے ڈی جی سی آئی ڈی ایم کے سنہا، کمشنر سیکریٹری جی اے ڈی ایم راجو، پرنسپل سیکریٹری برائے لیفٹیننٹ گورنر گووند جیسوال، آئی جی پی کشمیر سجیت سنگھ، ڈویژنل کمشنر کشمیر انشل گرگ، رینج ڈی آئی جیز، ڈپٹی کمشنروں، ایس ایس پیز اور دیگر سینئر افسران نے شرکت کی۔
۔۔۔۔۔۔(ڈی آئی پی آر)
