مبارک گل پارٹی کے جنرل سکریٹری کے عہدے سے برطرف، حاجی علی محمد ساگر کو عہدے کی ذمہ داری واپس سونپ دی گئی
سرینگر؍۳۰؍اکتوبر
حکمران جماعت نیشنل کانفرنس کے اندر بڑھتی ہوئی ناراضگی کے اشارے کے درمیان جمعہ کی دوپہر۱۸؍ ارکان اسمبلی نے سرینگر میں ایک اجلاس منعقد کرکے حالیہ کابینہ توسیع کے تناظر میں اپنی آئندہ حکمت عملی پر تبادلہ خیال کیا۔
ایک مقامی خبر رساں ایجنسی کے نے ذرائع کے حوالے سے بتایا کہ اجلاس نیشنل کانفرنس کے ایک رکن اسمبلی‘قیصر جمشید لون کی رہائش گاہ پر منعقد ہوا، جس میں نیشنل کانفرنس کے۱۷؍ارکان اسمبلی اور ایک آزاد رکن اسمبلی نے شرکت کی۔
ذرائع کے مطابق اجلاس میں اس بات پر غور کیا گیا کہ جس کابینہ توسیع کو غیر منصفانہ قرار دیا جا رہا ہے، اس کے خلاف کیا حکمت عملی اختیار کی جائے۔
اجلاس میں بڑی تعداد میں ارکان اسمبلی کی شرکت سے ظاہر ہوتا ہے کہ ناراض ارکان کا گروپ اس سے بھی بڑا ہو سکتا ہے، کیونکہ حالیہ حلف برداری تقریب کا بائیکاٹ کرنے والے بعض ارکان پہلے سے طے شدہ مصروفیات کے باعث اجلاس میں شریک نہیں ہو سکے۔
قابل ذکر ہے کہ منگل کو یہاں چار وزرا کی حلف برداری تقریب میں حکمران اتحاد کی حمایت کرنے والے۱۱ ارکان اسمبلی، جن میں زیادہ تر نیشنل کانفرنس سے تعلق رکھتے ہیں، غیر حاضر رہے تھے۔
ذرائع کے مطابق اجلاس میں شریک ارکان اسمبلی نے متفقہ طور پر مطالبہ کیا کہ ان چاروں وزرا کو تبدیل کیا جائے جنہوں نے۱۶؍اکتوبر۲۰۲۴ کو حکومت کی تشکیل کے وقت حلف اٹھایا تھا۔
ذرائع کا کہنا تھا کہ ان وزرا کو عہدے سنبھالے دو سال مکمل ہو چکے ہیں اور اب ان کی جگہ نئے چہروں کو موقع دیا جانا چاہیے۔
ایک مقامی خبر رساں ایجنسی کے ساتھ گفتگو کرتے ہوئے نذیر احمد گریز ی نے کہا کہ قیصر جمشید لون نے تمام ارکان اسمبلی کو لنچ پر مدعو کیا تھا اور اس ملاقات کو کوئی سیاسی رنگ نہیں دیا جانا چاہیے۔
ذرائع کے مطابق ملاقات میں شامل ارکان اسمبلی میں حسنین مسعودی (پانپور)، غلام محی الدین میر (راجپورہ)، جاوید احمد (کرناہ)، سیف الدین بھٹ (خان صاحب)، فاروق احمد شاہ (ٹنگمرگ)، مبارک گل (عیدگاہ)، نذیر احمد خان (گریز)، ہلال اکبر لون (سونہ واری)، بشیر احمد ویری (بجبہاڑہ)، عبدالحمید بھٹ عرف لَارمی (اننت ناگ ویسٹ)، اعجاز احمد جان (پونچھ حویلی)، جاوید اقبال چوہدری (بدھل)، ارجن سنگھ راجو (رام بن)، خورشید احمد (گلاب گڑھ)، ڈاکٹر سجاد شفیع (اوڑی)، مشتاق احمد گرو (چنہ پورہ) اور مظفر اقبال خان (تھنہ منڈی) شامل تھے۔
قابل ذکر ہے کہ کابینہ میں توسیع سے قبل عمر عبداللہ نے واضح کیا تھا کہ وزراء کی فہرست تیار ہے اور پارٹی ساتھیوں کو وزارت کے لیے لابنگ سے گریز کرنا چاہیے۔
سیاسی سرگرمیوں کا یہ سلسلہ۲۷؍ اکتوبر کو اس وقت اختتام پذیر ہوا جب لیفٹیننٹ گورنر منوج سنہا نے سرینگر کے ایس کے آئی سی سی میں نیشنل کانفرنس کے چار ارکان اسمبلی علی محمد ساگر، میر سیف اللہ، شمیمہ فردوس اور الطاف احمد کلو سے وزارت کا حلف لیا۔
کابینہ میں توسیع کے دوران آزاد رکن اسمبلی ستیش شرما کو وزارت سے ہٹا دیا گیا، جبکہ دیگر وزراء کو برقرار رکھا گیا۔ اس توسیع کے بعد وزراء کی کونسل اپنی آئینی حد تک پہنچ گئی، جس کے باعث کسی نئے وزیر کی شمولیت کے لیے موجودہ کابینہ میں تبدیلی ضروری ہو گئی ہے۔
ادھر نذیر احمد گریز ی، جنہیں وزارت کے ممکنہ امیدواروں میں شمار کیا جا رہا تھا، حلف برداری کی تقریب میں شریک نہیں ہوئے۔ ان کی غیر موجودگی بھی سیاسی حلقوں میں بحث کا موضوع بنی۔
حلف برداری کی تقریب کے چند گھنٹے بعد نئے وزراء میر سیف اللہ اور الطاف احمد کالو نے دیگر پارٹی ارکان قیصر جمشید لون اور ہلال اکبر لون کے ہمراہ گریز ی کی سرینگر کے تلسی باغ میں واقع رہائش گاہ پر ان سے ملاقات کی تھی۔
سابق اسپیکر اسمبلی اور نیشنل کانفرنس کے سینئر رہنما مبارک گل کی موجودگی بھی اس اجتماع کا ایک اہم پہلو رہی۔ کابینہ میں شامل نہ کیے جانے کے بعد نیشنل کانفرنس صدر ڈاکٹر فاروق عبداللہ نے انہیں پارٹی کا جنرل سیکریٹری مقرر کیا، یہ عہدہ اس سے قبل علی محمد ساگر کے پاس تھا۔
اسی طرح اننت ناگ ویسٹ کے رکن اسمبلی عبدالحمید بھٹ عرف لارمی بھی اس ملاقات میں موجود تھے، جنہوں نے وزارت میں شامل نہ کیے جانے پر مایوسی کا اظہار کیا تھا۔
راجوری اور پونچھ اضلاع سے تعلق رکھنے والے ارکان اسمبلی کی شرکت نے بھی اس ملاقات کو اہم بنا دیا، کیونکہ کابینہ میں ان دونوں سرحدی اضلاع کو نمائندگی نہ ملنے پر سوالات اٹھائے جا رہے ہیں۔
تھنہ منڈی کے رکن اسمبلی مظفر اقبال خان اس سے قبل بھی توسیع شدہ کابینہ میں خطہ پیر پنچال کو نمائندگی نہ ملنے پر تشویش ظاہر کر چکے ہیں۔ جمعہ کی ملاقات میں پونچھ حویلی کے اعجاز احمد جان اور بدھل کے جاوید اقبال چوہدری بھی ان کے ہمراہ موجود تھے۔
اس دوران نیشنل کانفرنس کے صدر ڈاکٹر فاروق عبداللہ نے باضابطہ حکم نامہ جاری کرتے ہوئے مبارک گل کو پارٹی کے جنرل سکریٹری کے عہدے سے ہٹا دیا ہے، جبکہ حاجی علی محمد ساگر کو پارٹی جنرل سکریٹری کی حیثیت سے کام جاری رکھنے کی ہدایت دی ہے۔
۔۔۔۔۔۔۔
