نئی دہلی؍۳۰ستمبر
وزیر اعظم نریندر مودی نے بدھ کے روز امریکی صدر ڈونالڈ ٹرمپ سے ٹیلی فون پر گفتگو کی، جس کے دوران دونوں رہنماؤں نے تجارت، دفاع، اہم ٹیکنالوجیز اور دیگر شعبوں میں بھارت اور امریکہ کے درمیان دوطرفہ تعاون میں ہونے والی پیش رفت کا جائزہ لیا۔
وزیر اعظم کے دفتر کی جانب سے جاری بیان کے مطابق دونوں رہنماؤں نے علاقائی اور بین الاقوامی صورتحال پر بھی تبادلہ خیال کیا اور عالمی امن و سلامتی کے فروغ کے لیے جاری کوششوں پر گفتگو کی۔
بیان میں کہا گیا کہ دونوں رہنماؤں نے بھارت۔امریکہ جامع عالمی اسٹریٹجک شراکت داری کو مزید آگے بڑھانے کے عزم کا اعادہ کیا اور دونوں ممالک کے عوام کے مفاد میں تعاون کو مزید گہرا کرنے کے لیے قریبی رابطہ برقرار رکھنے پر اتفاق کیا۔
وزیر اعظم کے دفتر نے کہا، ’’دونوں رہنماؤں نے تجارت، دفاع، توانائی، اہم ٹیکنالوجیز اور باہمی دلچسپی کے دیگر شعبوں میں دوطرفہ تعاون میں ہونے والی پیش رفت کا جائزہ لیا۔‘‘
وزیر اعظم نریندر مودی نے سوشل میڈیا پلیٹ فارم ’ایکس‘ پر ایک پوسٹ میں کہا، ’’صدر ٹرمپ کے ساتھ نتیجہ خیز گفتگو ہوئی۔ ہم نے تجارت، دفاع، توانائی، اہم ٹیکنالوجیز اور دیگر شعبوں میں اپنے دوطرفہ تعاون کا جائزہ لیا۔‘‘
انہوں نے مزید کہا، ’’ہم نے اپنی جامع عالمی اسٹریٹجک شراکت داری کو آگے بڑھانے کے لیے قریبی رابطہ برقرار رکھنے پر اتفاق کیا۔‘‘دونوں رہنماؤں نے ایک دوسرے کے ساتھ رابطے میں رہنے پر بھی اتفاق کیا۔
۔۔۔۔۔(ایجنسیاں)
