ریلوے بورڈ نے ریٹائرڈ ملازمین کی خدمات دوبارہ حاصل کرنے کی اسکیموں کو اکتوبر 2028 تک بڑھایا

نئی دہلی، 25 ستمبر (یو این آئی) ریلوے بورڈ نے خالی اسامیوں پر ریٹائرڈ ریلوے ملازمین کی تقرری اورانکی دوبارہ خدمات حاصل کرنے کی اسکیموں کو 15 اکتوبر 2028 تک بڑھا دیا ہے، جس میں غیر گزٹیڈ ملازمین، پیرا میڈیکل عملے اور ریلوے تربیتی اداروں میں انسٹرکٹرز سے متعلق عہدے شامل ہیں۔
ریلوے بورڈ کے ایک حکم نامے کے مطابق، جو اسکیمیں 15 اکتوبر 2026 تک نافذ رہنے والی تھیں، انہیں موجودہ شرائط و ضوابط کے ساتھ مزید دو سال کے لیے بڑھا دیا گیا ہے۔
اس حکم نامے میں کئی طرح کی اسکیمیں شامل ہیں، جن میں خالی غیر گزٹیڈ اسامیوں پر ریٹائرڈ ریلوے ملازمین کی تقرری اور پیرا میڈیکل عملے کی معاہدے (کنٹریکٹ) پر تقرری نیز مرکزی تربیتی اداروں میں انسٹرکٹر اور سینئر انسٹرکٹر کی خالی اسامیوں پر ریٹائرڈ ریلوے عملے کی دوبارہ تقرری وغیرہ شامل ہیں۔ موجودہ عام اسکیم کے تحت ریلوے کو اسامیوں کے عوض ریٹائرڈ غیر گزٹیڈ ملازمین کو دوبارہ مقرر کرنے کا اختیار دیا گیا ہے۔ جون 2025 کے ریلوے بورڈ کے ایک حکم نے مقررہ شرائط کے تابع، لیول ایک سے لیول نو تک کی خالی غیر گزٹیڈ اسامیوں کو اہل ریٹائرڈ ملازمین کی دوبارہ تقرری کے ذریعے بھرنے کی اجازت دی ہے۔
حالیہ حکم نامے میں ریٹائرڈ ملازم پر نافذ العمل پینشن سسٹم کی بنیاد پر تنخواہ اور ملازمت کی شرائط کے لیے الگ الگ ضوابط بھی طے کیے گئے ہیں۔ اولڈ پینشن اسکیم (او پی ایس) کے تحت دوبارہ مقرر ہونے والے ملازمین کی تنخواہ، الاؤنسز اور رخصت کے قواعد ‘محکمہ اخراجات’ کی 9 دسمبر 2020 کی ہدایت کے مطابق طے ہوں گے۔ نیشنل پینشن سسٹم (این پی ایس) کے تحت آنے والے ملازمین کی تنخواہ اور ملازمت کی دیگر شرائط وزارت مالیات کے ‘محکمہ اخراجات’ کی 18 اکتوبر 2023 کی ہدایت کی بنیاد پر طے ہوں گی۔
ریلوے بورڈ نے واضح کیا کہ جن معاملات میں پہلے دوبارہ تقرری کے دوران معاوضے، رخصت یا اس سے جڑے معاملات کو ان ہدایتوں سے مختلف طریقے سے طے کیا گیا تھا، انہیں دوبارہ کھولنے کی ضرورت نہیں ہے، ایسا تب تک نہیں کیا جائے گا جب تک کہ ان معاملات کی عام مدت ختم نہ ہو جائے یا 15 اکتوبر 2026 نہ آ جائے یا ان میں سے جو بھی تاریخ پہلے آئے۔ اس میں یہ بھی دہرایا گیا کہ دوبارہ تقرری کا فیصلہ صرف ضروری صورت حال میں اور پوری احتیاط کے ساتھ کیا جانا چاہیے۔ ریلوے بورڈ کے پہلے کے احکامات میں دی گئی باقی تمام شرائط و ضوابط ویسے ہی رہیں گے۔