ڈاک محکمہ نے انتظامی ڈھانچے کی ازسرنو تشکیل کا حکم دیا، 30 ستمبر تک کی آخری تاریخ مقرر

نئی دہلی، 19 ستمبر (یو این آئی) ڈاک محکمہ نے اپنے انتظامی ڈھانچے میں بڑے پیمانے پر تبدیلی کا حکم دیا ہے۔ محکمہ نے تمام ڈاک سرکلوں، علاقائی دفاتر، ڈاک ڈویژنوں اور ریلوے میل سروس (آر ایم ایس) ڈویژنوں میں ازسرنو تشکیل کا عمل شروع کیا ہے۔ موجودہ نظام میں شاخوں اور کام کے بوجھ کی غیر مساوی تقسیم دیکھی گئی تھی، جسے درست کرنے کے لیے یہ قدم اٹھایا گیا ہے۔
ڈاک محکمہ نے 15 ستمبر کو جاری حکم میں تمام ڈاک سرکلوں کو 30 ستمبر تک نیا انتظامی ڈھانچہ نافذ کرنے کی ہدایت دی ہے۔ اس کے ساتھ ہی 5 اکتوبر تک تعمیلی رپورٹ بھیجنے کو کہا گیا ہے۔
اس ازسرنو تشکیل کا بنیادی مقصد تمام سطحوں پر ذمہ داری اور کام کے دائرے میں یکسانیت لانا ہے، تاکہ مقامی عملیاتی ضروریات اور کام کاج کے مطابق لچک برقرار رہے۔
نئے ڈھانچے کے تحت سرکل دفاتر میں اسسٹنٹ پوسٹ ماسٹر جنرل (اے پی ایم جی) اور اسسٹنٹ ڈائریکٹروں سمیت گروپ افسران کے پاس یکساں چارج ہوں گے۔
یہ نظام ڈائریکٹوریٹ جنرل کے ڈھانچے کے مطابق ہوگا، جس سے تال میل، فوری ردعمل اور پالیسیوں کے ہموار نفاذ میں مدد ملے گی۔
ڈاک ڈویژن دفاتر کے لیے 2 طرح کے ماڈل تیار کیے گئے ہیں- ’2 آئی پی/اے ایس پی ماڈل‘ اور ’3 آئی پی/اے ایس پی ماڈل‘۔
دیہی اور چھوٹے ڈویژنوں میں 2 افسران کا ماڈل نافذ ہوگا، جبکہ شہری، بڑے اور لاجسٹکس پر مرکوز ڈویژنوں میں 3 افسران والا ماڈل کام کرے گا۔
محکمہ نے واضح کیا ہے کہ غیر ضروری اضافی ملازمین کی تعیناتی نہ کی جائے۔ لاجسٹکس کی صلاحیت رکھنے والے ڈویژنوں کی شناخت کرتے وقت موجودہ کاروباری ضروریات کو ترجیح دی جائے گی۔ اس کے علاوہ، اہم شاخوں کی نگرانی بہتر بنانے کے لیے ضرورت کے مطابق سینئر افسران کو بھی ڈویژن دفاتر میں تعینات کرنے کی اجازت دی گئی ہے۔
ریلوے میل سروس (آر ایم ایس) نیٹ ورک کو بھی اس ازسرنو تشکیل میں شامل کیا گیا ہے۔ آر ایم ایس ڈویژنوں میں میل اور پارسل کی کارروائی میں لگنے والے وقت کو کم کرنے اور نگرانی مضبوط کرنے کے لیے انسپکٹروں اور اسسٹنٹ سپرنٹنڈنٹ کی تعیناتی کا ڈھانچہ طے کیا گیا ہے۔ کم چھٹائی دفاتر والے چھوٹے آر ایم ایس ڈویژنوں میں ضرورت کے مطابق 3 سے 4 افسران تعینات کیے جا سکیں گے۔
علاقائی دفاتر بھی اب یکساں تنظیمی ڈھانچہ اپنائیں گے۔ علاقے کے سربراہ اپنی عملیاتی ضروریات کی بنیاد پر ملازمین کی تعیناتی کے بارے میں فیصلہ کر سکیں گے۔ اس کے علاوہ، ہر سرکل آپریشنز رکن کے مشورے سے اپنے لاجسٹکس ڈھانچے کو حتمی شکل دے گا۔
ڈاک سکریٹری سے منظوری ملنے کے بعد نائب ڈائریکٹر جنرل (اسٹیبلشمنٹ) دشینت مڈگل نے یہ حکم جاری کیا ہے۔ انہوں نے تمام ڈاک سرکلوں کے سربراہوں کو مقررہ مدت کے اندر ازسرنو تشکیل کا عمل مکمل کرنے کی ہدایت دی ہے۔