وزیراعلیٰ ریکھا گپتا نے ویدانتا دہلی ہاف میراتھن 2026 کے فنیشر میڈل کی رونمائی کی

نئی دہلی، 16 ستمبر (یو این آئی) ورلڈ ایتھلیٹکس گولڈ لیبل ریس ویدانتا دہلی ہاف میراتھن کے 21ویں ایڈیشن کے فنیشر میڈل کی رونمائی کی ۔ دہلی حکومت کی وزیراعلیٰ ریکھا گپتا نے دہلی سکریٹریٹ میں میڈل کی رونمائی کی۔ یہ میڈل ہر دوڑ کے اختتام تک پہنچنے والے کھلاڑی کی کامیابی کی علامت ہوگا۔
ویدانتا دہلی ہاف میراتھن 18 اکتوبر کو جواہر لال نہرو اسٹیڈیم سے شروع ہوگی، جس میں ہندوستان اور دنیا بھر سے ہزاروں رنرز شرکت کریں گے۔ گزشتہ دو دہائیوں میں یہ مقابلہ دہلی کی کھیل شناخت کا اہم حصہ بن چکا ہے اور فٹنس، شرکت اور دوڑ کے جذبے کو فروغ دے رہا ہے۔
وزیراعلیٰ ریکھا گپتا نے کہا کہ صحت، فٹنس، خواتین کی بڑھتی شرکت اور سماجی و اقتصادی و فلاحی اثرات پر توجہ دینے والی یہ ہاف میراتھن قومی دارالحکومت کے لیے ایک اہم پہل بن گئی ہے۔ انہوں نے کہا کہ شرکا کا جوش و جذبہ متاثر کن ہے اور دہلی حکومت اس ایونٹ کی کامیابی کے لیے تعاون جاری رکھے گی۔
2026 کا فنیشر میڈل ہندوستان میں تیار کیا گیا ہے اور ویدانتا گروپ کی کمپنی ہندوستان زنک لمیٹڈ نے اسے ادے پور کی مشہور زاور مائنز سے حاصل کیے گئے اعلیٰ معیار کے زنک سے تیار کیا ہے۔ میڈل کا ڈیزائن ہندوستان کے قدرتی ورثے اور ہر رنر کی محنت، عزم اور ذاتی کامیابی کی عکاسی کرتا ہے۔
منتظمین کے مطابق ہاف میراتھن کی رجسٹریشن صرف 100 گھنٹوں میں مکمل ہوگئی، جو ایونٹ کی تاریخ میں سب سے تیز بند ہونے والی رجسٹریشن ہے۔ ’دی گریٹ دہلی رن‘، ’چیمپئنز ود ڈس ایبلٹی‘ اور ’سینئر سٹیزن رن‘ کو بھی زبردست ردعمل مل رہا ہے اور ان کے لیے رجسٹریشن تیزی سے مکمل ہورہی ہے۔