سرینگر/۱۶ستمبر
کشمیر زون کے انسپکٹر جنرل آف پولیس سوجیت کمار نے بدھ کے روز وسطی کشمیر رینج میں موجودہ سکیورٹی صورتحال اور پولیس اہلکاروں کی تیاریوں کا جائزہ لیا۔
سوجیت کمار نے یہاں پولیس کنٹرول روم میں منعقدہ ایک اجلاس کے دوران سکیورٹی صورتحال کا جائزہ لیا۔
کشمیر کے آئی جی پی کو فیلڈ افسران نے اپنے اپنے علاقوں میں موجودہ سکیورٹی صورتحال کے بارے میں بریفنگ دی۔ اس دوران اہلکاروں کی تعیناتی اور آپریشنل تیاریوں پر خصوصی توجہ مرکوز کی گئی۔
ایک سرکاری ترجمان نے بتایا کہ افسران نے امن و امان برقرار رکھنے اور محفوظ ماحول کو یقینی بنانے کے لیے قائم کیے گئے سکیورٹی نظام کے بارے میں بھی آئی جی پی کو آگاہ کیا۔
سوجیت کمار نے انسدادِ عسکریت پسندی کی کارروائیوں، علاقے میں مؤثر غلبہ قائم کرنے، حساس مقامات پر ناکہ بندی اور تلاشی کے عمل میں شدت لانے کے ساتھ ساتھ بین الاضلاعی سرحدوں پر چیکنگ اور نگرانی مزید مضبوط بنانے کی ضرورت پر زور دیا۔
آئی جی پی نے افسران کو ہدایت دی کہ سکیورٹی انتظامات کو متحرک اور کسی بھی حساس صورتحال کے مطابق فوری ردعمل دینے کے قابل رکھا جائے۔
انہوں نے سکیورٹی انتظامات کا باقاعدگی سے جائزہ لینے اور جہاں ضرورت ہو وہاں بروقت اضافی نفری تعینات کرنے کی اہمیت پر بھی زور دیا۔
سوجیت کمار نے افسران کو چوکسی برقرار رکھنے اور امن و عوامی سلامتی کے تحفظ کے لیے تمام ضروری احتیاطی اقدامات یقینی بنانے کی ہدایت بھی دی۔
۔۔۔۔۔۔ایجنسیاں
