انجیئنرز ڈے پر وزیراعظم مودی نے انجینئروں کو مبارکباد دی، وشویشوریا کے ملک کی تعمیر کے وژن کو یاد کیا

نئی دہلی، 15 ستمبر (یو این آئی) وزیراعظم نریندر مودی نے منگل کے روز انجینئرز ڈے کے موقع پر ملک بھر کے انجینئروں کو مبارکباد دیتے ہوئے اختراع کو فروغ دینے، بنیادی ڈھانچے کی تعمیر اور ایک بہتر مستقبل کے لیے حل تیار کرنے میں ان کے کردار کی تعریف کی، نیز عظیم انجینئر اور مدبر سر موکش گونڈم وشویشوریا کو خراجِ عقیدت پیش کیا۔
سوشل میڈیا پلیٹ فارم ایکس پر ایک پوسٹ میں نریندر مودی نے کہا، تمام باصلاحیت انجینئروں کوانجینئرزڈے مبارک ہو، جو ایک بہتر کل کے لیے تعمیرات کرتے ہیں، اختراعات لاتے ہیں اور حل فراہم کرتے ہیں۔”
وزیراعظم نے وشویشوریا کو بھی یاد کیا، جن کی انجینئرنگ سے متعلق غیر معمولی ذہانت ، عوامی بنیادی ڈھانچے اور قوم کی تعمیر کے شعبے میں انکی کاوشیں ہندوستانیوں کی آنے والی نسلوں کو مسلسل تحریک دے رہی ہیں۔
نریندر مودی نے کہا، "سر ایم وشویشوریا کو خراجِ عقیدت، جن کی انجینئرنگ کی ذہانت اور قوم کی تعمیر کا وژن مسلسل ترغیب کا باعث ہے۔”
ہندوستان میں ہر سال 15 ستمبر کو وشویشوریا کے یومِ پیدائش کے موقع پر ‘انجیئنرز ڈے منایا جاتا ہے، جو 15 ستمبر 1861ء کو کرناٹک میں پیدا ہوئے تھے۔ ہندوستان کے سرکردہ انجینئروں میں شمار ہونے والے وشویشوریا نے آبپاشی، پانی کی فراہمی، سیلاب سے تحفظ اور بنیادی ڈھانچے کی ترقی میں نمایاں خدمات انجام دیں اور بعد میں سابقہ ریاستِ میسور کے دیوان کے طور پر بھی خدمات انجام دیں۔
وشویشوریا صنعت کاری، تعلیم اور تکنیکی پیش رفت کے بھی زبردست حامی تھے، اور ان کے کام نے ہندوستان میں جدید بنیادی ڈھانچے اور عوامی انجینئرنگ کی اہم بنیادیں رکھنے میں مدد کی۔ انہیں 1955ء میں ملک کے اعلیٰ ترین شہری اعزاز ‘بھارت رتن سے نوازا گیا تھا۔
وزیراعظم نریندر مودی کا انجینئرز ڈے کا یہ پیغام معاشی ترقی اور پیش رفت کے محرک کے طور پر انجینئرنگ، ٹیکنالوجی اور اختراع پر ہندوستان کی بڑھتی ہوئی توجہ کے تناظر میں سامنے آیا ہے۔ ملک کے مادی بنیادی ڈھانچے کی توسیع کے ساتھ ساتھ ڈیجیٹل ٹیکنالوجی، مینوفیکچرنگ، خلائی تحقیق اور ابھرتے ہوئے تکنیکی شعبوں میں پیش رفت میں انجینئرز کا مرکزی کردار رہا ہے۔
وشویشوریا کی میراث کا حوالہ دیتے ہوئے وزیراعظم نے انجینئرنگ کی پائیدار اہمیت کو نہ صرف ایک تکنیکی شعبے کے طور پر بلکہ اختراع، عوامی خدمت اور قوم کی تعمیر کے ایک ذریعہ کے طور پر اجاگر کیا۔ اس خراجِ عقیدت نے ہندوستان کے ترقیاتی سفر کو مضبوط بنانے کے مقصد سے تکنیکی مہارت اور نئے خیالات کو عملی حل میں تبدیل کرنے میں انجینئروں کے کردار کو بھی نمایاں کیا۔