ایشین چیمپئنز ٹرافی کے لیے پاکستان کو ہندوستان آنے کی حکومت کی منظوری کا انتظار

نئی دہلی، 15 ستمبر (یو این آئی) اگلے ماہ ہندوستان میں ہونے والی ہاکی ایشین چیمپئنز ٹرافی میں پاکستان کی شرکت ابھی یقینی نہیں ہوئی ہے اور پاکستان ہاکی فیڈریشن (پی ایچ ایف) ٹیم کے ہندوستان سفر کے لیے حکومت کی منظوری کی منتظر ہے۔
پی ایچ ایف کے سربراہ محی الدین احمد وانی نے کہا کہ ٹورنامنٹ میں شرکت کا فیصلہ حکومت کی منظوری پر منحصر ہے اور فیڈریشن حکومت کی ہدایت کے مطابق عمل کرے گی۔ چھ ملکی ٹورنامنٹ 27 اکتوبر سے 5 نومبر تک پنجاب میں کھیلا جائے گا، جس میں ہندوستان، پاکستان، چین، جاپان، ملائیشیا اور کوریا کی ٹیمیں حصہ لیں گی، جبکہ عمان اور بنگلہ دیش ریزرو ٹیمیں ہوں گی۔
ٹورنامنٹ کا لیگ مرحلہ 27 اکتوبر سے 2 نومبر تک جالندھر میں ہوگا، جبکہ سیمی فائنل 4 نومبر اور فائنل 5 نومبر کو کھیلا جائے گا۔ پنجاب کے وزیراعلیٰ بھگونت مان نے پیر کو کہا تھا کہ پاکستان ہندوستان کا دورہ کرے گا اور واضح کیا تھا کہ کثیر ملکی مقابلوں میں شرکت کی اجازت ہے، جبکہ دونوں ملکوں کے درمیان دو طرفہ مقابلے نہیں ہوں گے۔
ہندوستان اور پاکستان یکم نومبر کو جالندھر میں آمنے سامنے ہوں گے اور یہ میچ پنجاب ڈے کے موقع پر ہوگا۔ مسٹر مان نے کہا کہ یہ مقابلہ ٹورنامنٹ کی سب سے بڑی کشش میں شامل ہوگا۔ کھیلوں کی وزارت نے 5 مئی کے ایک دفتری میمورنڈم میں بھی واضح کیا تھا کہ پاکستان کے کھلاڑی اور ٹیمیں ہندوستان میں منعقد ہونے والے کثیر ملکی مقابلوں میں شرکت کرسکتی ہیں اور کھلاڑیوں، عہدیداروں اور بین الاقوامی فیڈریشن کے نمائندوں کے لیے ویزا نظام میں تعاون کی بات کہی تھی۔