ماروتی سوزوکی منتخب ماڈلز کی قیمتوں میں اضافہ کرے گی

نئی دہلی، 7 ستمبر (یواین آئی) ملک کی سب سے بڑی کار ساز کمپنی ماروتی سوزوکی انڈیا نے رواں ماہ سے اپنے منتخب ماڈلز کی قیمتوں میں اضافہ کرنے کا اعلان کیا ہے۔
کمپنی نے پیر کو شیئر بازاروں کو بتایا کہ وہ ستمبر 2026 میں منتخب ماڈلز کی قیمتوں میں 20 ہزار روپے تک کا اضافہ کرے گی۔ تاہم کمپنی نے ان ماڈلز کے نام ظاہر نہیں کیے ہیں جن کی قیمتیں بڑھائی جائیں گی۔ اس کے علاوہ یہ بھی نہیں بتایا گیا ہے کہ قیمتوں میں اضافہ کس مقررہ تاریخ سے نافذ ہوگا۔
کمپنی کا کہنا ہے کہ اس نے مہنگائی کے دباؤ کے باعث قیمتیں بڑھانے کا فیصلہ کیا ہے۔ اس نے کہاکہ ’’گزشتہ چند ماہ سے کمپنی لاگت میں اضافے کے اثرات کو ممکنہ حد تک کم کرنے کے لیے اخراجات میں کمی کے مختلف اقدامات کر رہی ہے۔ تاہم مہنگائی کا دباؤ بلند سطح پر برقرار ہے اور ناموافق لاگت کے حالات بھی جاری ہیں۔ ایسی صورت حال میں کمپنی بڑھتی ہوئی لاگت کا ایک حصہ بازار پر منتقل کرنے پر مجبور ہے۔‘‘
ماروتی سوزوکی نے کہا کہ وہ یہ یقینی بنانے کی کوشش جاری رکھے گی کہ صارفین پر اس اضافے کا ممکنہ حد تک کم اثر پڑے۔
کمپنی نے اس سے قبل اگست میں بھی اپنی تمام مسافر گاڑیوں کی قیمتوں میں 2,500 روپے سے 30,000 روپے تک کا اضافہ کیا تھا۔ اس وقت بھی کمپنی نے بلند افراطِ زر اور بڑھتی ہوئی لاگت کو قیمتوں میں اضافے کی وجہ قرار دیا تھا۔