وانگچک کوجنترمنتر سے ہٹانا ،طلبا کی آواز دبانا غلط : راہل

نئی دہلی، 18 جولائی (یو این آئی) کانگریس کے سابق صدر اور لوک سبھا میں اپوزیشن کے لیڈر راہل گاندھی نے کہا ہے کہ مودی سرکار کا اصول جھوٹ اور تشدد پر مبنی ہے، اس لیے وہ عوام سے جڑے ہر معاملے میں غلط فیصلے کرتی ہے۔
مسٹر گاندھی نے ہفتہ کو سوشل میڈیا ‘ایکس’ پر کہا کہ سماجی کارکن سونم وانگچک عوامی مفاد کی لڑائی لڑ رہے ہیں اور وہ جنتر منتر پرپرامن طریقے سے بھوک ہڑتال کر رہے تھے، لیکن سرکار نے آج صبح اچانک سونم وانگچک کو وہاں سے ہٹا دیا، جو کہ پوری طرح غلط ہے۔ انہوں نے کہا کہ اسی طرح سے پیپر لیک، تعلیم کے بڑھتے ہوئے اخراجات اور طلبہ کی خودکشیاں ہندوستان کے مستقبل سے جڑے انتہائی سنگین مسائل ہیں۔ ان مسائل کو طاقت کے بل پر دبایا نہیں جا سکتا۔
مسٹر گاندھی نے پیپر لیک کے خلاف اپنی ‘چھاتروں کی گونج’ مہم کا بھی ذکر کرتے ہوئے کہا، "ہندوستان کے طلبہ اور ان پر یقین رکھنے والے لوگ ان مسائل کو اٹھاتے رہیں گے۔ کوئی بھی طاقت انہیں اپنی آواز بلند کرنے سے نہیں روک سکتی۔”