ویشنو اور دھامی نے دکھائی رام نگر-دہرادون ایکسپریس کو ہری جھنڈی

ژنئی دہلی، 18 جولائی (یو این آئی) ریلوے کے وزیر اشونی ویشنو اور اتراکھنڈ کے وزیر اعلیٰ پشکر سنگھ دھامی نے ہفتہ کو ویڈیو کانفرنسنگ کے ذریعے رام نگر-دہرادون ایکسپریس کو ہری جھنڈی دکھا کر روانہ کیا۔ اسی کے ساتھ ہی رام نگر سے دہرادون تک ٹرین چلانے کا طویل عرصے سے چلا آ رہا مقامی باشندوں کا مطالبہ پورا ہو گیا۔
مسٹر ویشنو نے دہلی سے، مسٹر دھامی نے دہرادون سے ویڈیو کانفرنسنگ کے ذریعے اور پوڑی کے رکن پارلیمنٹ انل بلونی، ہری دوار کے رکن پارلیمنٹ تریویندر راوت، مقامی ایم ایل اے دیوان سنگھ بشٹ نے رام نگر ریلوے اسٹیشن سے ٹرین کو ہری جھنڈی دکھا کر روانہ کیا۔ اس موقع پر مسٹر ویشنو نے کماؤں اور گڑھوال کو اتراکھنڈ کے مضبوط ستون بتاتے ہوئے کہا کہ رام نگر دہرادون ٹرین کماؤں گڑھوال کے لیے پل کا کام کرے گی۔ انہوں نے کہا کہ اس ٹرین کے ذریعے کماؤں کے لوگ اپنے کام سے دہرادون آ جا سکیں گے۔ ابھی مرادآباد میں کام چل رہا ہے، اس لیے ٹرین دو دن چلائی جا رہی ہے۔ اس کے بعد اسے روزانہ چلانے کی کوشش کی جائے گی۔ انہوں نے اتراکھنڈ میں چل رہے ریلوے پروجیکٹوں کی معلومات دی اور کہا کہ رِشی کیش کرن پریاگ ریل لائن سے کافی فائدہ ہونے والا ہے۔
وہیں، مسٹر دھامی نے کہا کہ یہ ریل سہولت کماؤں کو گڑھوال سے جوڑے گی۔ اس دور میں ریل سہولیات کی توسیع ہوئی ہے۔ ریلوے کے مسافروں کی حفاظت، سہولت، رفتار، کارکردگی اور صلاحیت کو رفتار ملی ہے۔ یہ ٹرین رام نگر سے ہفتے میں دو دن بدھ اور جمعہ کو چلے گی اور اسی دن واپسی بھی کرے گی۔ وزارتِ ریل کے مطابق 15309/15310 رام نگر-دہرادون-رام نگر ایکسپریس کا آپریشن ہر بدھ اور جمعہ کو کیا جائے گا۔ رام نگر سے یہ ٹرین صبح 5:50 بجے روانہ ہو کر دوپہر بعد 12:40 بجے دہرادون پہنچے گی۔ واپسی میں دہرادون سے دوپہر 3:55 بجے چل کر رات 11:30 بجے رام نگر پہنچے گی۔ اس سے مسافروں کو ایک ہی دن میں دہرادون جا کر اپنا کام نپٹا کر واپس لوٹنے کی سہولت ملے گی۔ یہ ٹرین کاشی پور، روشن پور، پیپل سانہ، مرادآباد، نجیب آباد اور ہری دوار اسٹیشنوں پر رکے گی۔
اس میں ایک لگیج کوچ، جنرل سیکنڈ کلاس کے تین، سلیپر کلاس کے تین، اے سی تھرڈ کلاس کے دو، اے سی سیکنڈ کلاس کا ایک، اے سی چیئر کار کا ایک، جنرل سیکنڈ کلاس چیئر کار کے چار اور ایک ایل ایس ایل آر ڈی کوچ لگے گا۔