دہرادون ٹی-20 لیگ 2026 کے کپتانوں کا اعلان

دہرادون، 29 اگست (یو این آئی) پہلی دہرادون ٹی-20 لیگ 2026 کے لیے تمام چھ فرنچائز ٹیموں نے اپنے کپتانوں کے ناموں کا باضابطہ اعلان کردیا ہے۔ یہ ٹورنامنٹ 2 سے 9 ستمبر تک دہرادون کی ابھیمنیو کرکٹ اکیڈمی میں کھیلا جائے گا۔
مسوری تھنڈر کی قیادت آکاش مدھوال کریں گے، جبکہ ہربرٹ پور نائٹ رائیڈرز کے کپتان جگدیشا سوچت ہوں گے۔ دوئی والا کنگز نے ٹی این آر موہت، وکاس نگر دھماکا نے کنال چندیلا، رشیکیش ڈریگنز نے یوراج چودھری اور سیلاکوئی اسٹرائیکرز نے پیوش جوشی کو ٹیم کی قیادت سونپی ہے۔
لیگ کے سی ای او نونیت مشرا نے کہا کہ آئی پی ایل اور ڈومیسٹک کرکٹ کا تجربہ رکھنے والے کپتانوں کی موجودگی مقامی اور نوجوان کھلاڑیوں کے لیے نہایت فائدہ مند ثابت ہوگی۔ ان کے مطابق آکاش مدھوال اور جگدیشا سوچت جیسے کھلاڑیوں کو اعلیٰ سطح کی کرکٹ کا وسیع تجربہ حاصل ہے، جبکہ کنال چندیلا اور ٹی این آر موہت مقامی حالات سے اچھی طرح واقف ہیں۔
انہوں نے امید ظاہر کی کہ آٹھ روزہ ٹورنامنٹ کے دوران تجربہ کار کپتانوں کی رہنمائی اور دباؤ بھرے مقابلوں میں ان کے ساتھ کھیلنے کا تجربہ نوجوان کھلاڑیوں کی صلاحیتوں کو نکھارنے میں اہم کردار ادا کرے گا۔