منسکھ مانڈویہ نے کھیل اور فٹنس میں زیادہ شرکت کی اپیل کی

نئی دہلی، 29 اگست (یو این آئی) ملک نے عظیم ہاکی کھلاڑی میجر دھیان چند کی 121ویں جینتی کے موقع پر آج قومی کھیلوں کا دن منایا۔ اس موقع پر نوجوان امور اور کھیلوں کے مرکزی وزیر ڈاکٹر منسکھ مانڈویہ نے لوگوں، خصوصاً نوجوانوں سے کھیلوں اور جسمانی سرگرمیوں میں زیادہ سے زیادہ حصہ لینے کی اپیل کی۔
نئی دہلی میں انڈیا گیٹ کے نزدیک میجر دھیان چند نیشنل اسٹیڈیم میں خصوصی کھیل پروگرام کا انعقاد کیا گیا، جس میں ڈاکٹر منسکھ مانڈویہ اور مرکزی قانون و انصاف کے وزیر ارجن رام میگھوال نے شرکت کی۔ تقریب کا مرکزی موضوع ملک گیر ’’ایک گھنٹہ کھیل کے میدان میں‘‘ مہم تھی، جس کا مقصد شہریوں کو کھیل اور جسمانی سرگرمیوں کے لیے روزمرہ زندگی میں وقت نکالنے کی ترغیب دینا ہے۔
تقریب کا آغاز میجر دھیان چند کے مجسمے پر گلہائے عقیدت پیش کرنے سے ہوا۔ صبح آٹھ بجے سے سیکڑوں افراد نے مختلف کھیلوں اور فٹنس سرگرمیوں میں حصہ لیا۔ ڈاکٹر مانڈویہ نے کہا کہ اس مہم کا مقصد ’’فٹ انڈیا موومنٹ‘‘ کو مضبوط کرنا اور کھیل کو لوگوں کی روزمرہ زندگی کا حصہ بنانا ہے۔
انہوں نے کہا کہ ملک بھر میں لاکھوں نوجوان ایک گھنٹہ کھیل کے میدان میں گزارنے کے لیے آگے آ رہے ہیں اور ایک صحت مند اور مضبوط ہندوستان کی تعمیر کے لیے ہر فرد کو اپنی فٹنس پر توجہ دینی چاہیے۔
اس موقع پر کرکٹ، فٹ بال اور رسہ کشی سمیت مختلف سرگرمیوں کا بھی اہتمام کیا گیا۔ کرکٹ مقابلے میں منسٹری الیون، سائی الیون، میڈیا الیون اور انفلوئنسرز الیون کی ٹیموں نے حصہ لیا، جبکہ ڈاکٹر منسکھ مانڈویہ کی قیادت والی منسٹری الیون نے اپنے ابتدائی میچ میں میڈیا الیون کو شکست دی۔
ارجن رام میگھوال نے بھی قومی کھیلوں کے دن پر عوام کو مبارکباد دیتے ہوئے جسمانی اور ذہنی صحت برقرار رکھنے کے لیے باقاعدہ کھیل اور جسمانی سرگرمیوں کی اہمیت پر زور دیا۔