دنوشا کی شاندار سنچری سے سری لنکا نے ٹیسٹ ڈرا کرادیا، ہندوستان نے سیریز0۔1 سے جیتی

کولمبو، 27 اگست (یو این آئی) سونال دنوشا کی ناٹ آوٹ 133 رنز کی شاندار اننگز کی بدولت سری لنکا نے دوسرے ٹیسٹ کے پانچویں دن جمعرات کو 9 وکٹ پر 429 رنز بناکر اننگز ڈکلیئر کردی اور ہندوستان کو فتح سے روک کر میچ ڈرا کرادیا۔ اس کے ساتھ ہندوستان نے دو میچوں کی سیریز 1-0 سے اپنے نام کرلی۔
چوتھے دن سری لنکا کو صرف 16 رنز کی برتری حاصل تھی اور اس کی چار وکٹیں باقی تھیں، لیکن سونال دنوشا کی قیادت میں ٹیم نے زبردست واپسی کرتے ہوئے ہندوستان کی جیت کی امیدیں ختم کردیں۔ ہندوستان کی جانب سے کسی ٹیم کو فالو آن کرانے کے بعد فتح حاصل نہ کرنے کا یہ پہلا موقع ہے، حالانکہ وہ اس سے قبل 9 بار حریف کو فالو آن کراچکا ہے۔
سری لنکا نے دن کا آغاز 6 وکٹ پر 229 رنز سے کیا۔ صبح کے سیشن میں ہندوستانی گیندباز ایک بھی وکٹ حاصل نہ کرسکے اور سری لنکا نے مزید 100 رنز جوڑ لیے۔ دنوشا نے نصف سنچری مکمل کی جبکہ کیشرا نوانتھا بھی اچھی بیٹنگ کررہے تھے۔ لنچ تک سری لنکا نے 6 وکٹ پر 329 رنز بنائے تھے۔
لنچ کے بعد مانَو سُتھار نے کیشرا نوانتھا کو 46 رنز پر آؤٹ کیا، جبکہ رویندر جڈیجا نے پربھات جے سوریا کو 2 رنز پر پویلین بھیجا۔ بعد میں جڈیجا نے لہیرو کمارا کو 12 رنز پر آؤٹ کرکے سری لنکا کی نویں وکٹ حاصل کی۔ اس کے بعد سری لنکا نے 154ویں اوور میں 9 وکٹ پر 429 رنز پر اننگز ڈکلیئر کردی اور میچ ڈرا ہوگیا۔
سونال دنوشا 133 رنز پر ناٹ آؤٹ رہے، جبکہ اسیتھا فرنانڈو نے 24 گیندیں کھیلیں لیکن کوئی رن نہیں بنایا۔
ہندوستان کی جانب سے رویندر جڈیجا اور مانَو سُتھار نے 3،3 وکٹیں حاصل کیں، جبکہ پرسدھ کرشنا، محمد سراج اور سارانش جین نے ایک، ایک وکٹ لی۔
دونوں اننگز میں سنچری بنانے والے سونال دنوشا کو پلیئر آف دی میچ قرار دیا گیا، جبکہ سیریز میں 328 رنز بنانے والے ہندوستان کے دیودت پڈیکل کو پلیئر آف دی سیریز کا اعزاز ملا۔