آسٹریلیا سیریز کے لیے آریاویر سہواگ کو ہندوستان کی انڈر 19 ٹیم میں جگہ ملی

ممبئی، 27 اگست (یو این آئی) عظیم بلے باز وریندر سہواگ کے بیٹے آریاویر سہواگ کو پہلی بار ہندوستان کی انڈر 19 ٹیم میں منتخب کیا گیا ہے۔ انہیں ستمبر میں راجکوٹ میں آسٹریلیا کے خلاف ہونے والی تین ایک روزہ میچوں کی سیریز کے لیے ٹیم میں شامل کیا گیا ہے۔
دائیں ہاتھ کے بلے باز آریاویر نے حالیہ دہلی پریمیئر لیگ 2026 میں ویسٹ دہلی لائنز کی نمائندگی کی، جہاں ان کے جارحانہ اندازِ بلے بازی کا موازنہ ان کے والد سے کیا گیا۔ اس سے قبل 2024 میں کوچ بہار ٹرافی میں میگھالیہ کے خلاف 297 رنز کی شاندار اننگز کھیل کر بھی وہ سرخیوں میں آئے تھے۔
ون ڈے ٹیم میں وکٹ کیپر انویہ دراوڑ بھی شامل ہیں، جنہوں نے جولائی میں سری لنکا کے دورے پر انڈر 19 ٹیم کی جانب سے 87 رنز کی عمدہ اننگز کھیلی تھی۔ تاہم آریاویر اور انویہ دونوں کو دو ملٹی ڈے میچوں کے اسکواڈ میں شامل نہیں کیا گیا ہے۔
اوپنر لکشیا رائچندانی ون ڈے میچوں میں ہندوستانی ٹیم کی کپتانی کریں گے، جبکہ سری لنکا دورے پر ٹیم کی قیادت کرنے والے یشوردھن چوہان نائب کپتان ہوں گے۔ ملٹی ڈے میچوں میں دونوں کی ذمہ داریاں تبدیل کردی جائیں گی۔
ہندوستان اور آسٹریلیا کے درمیان تین ون ڈے میچ راجکوٹ میں 18، 21 اور 23 ستمبر کو کھیلے جائیں گے۔ پہلا ملٹی ڈے میچ 27 سے 30 ستمبر تک راجکوٹ میں، جبکہ دوسرا 5 سے 8 اکتوبر تک احمد آباد میں ہوگا۔
ہندوستان انڈر 19 ون ڈے ٹیم: لکشیا رائچندانی (کپتان)، یشوردھن چوہان (نائب کپتان)، رجت باگھیل، آریاویر سہواگ، وی کے وینیت، کشاگرا اوجھا، ارجن راجپوت، منال چوہان، انویہ دراوڑ، وی یشویر، روہت یادو، شوین ونود، موہت اولوا، چگورپتی وینکٹ اور کاویا پٹیل۔