رنکو سنگھ کی جارحانہ اننگز سے میرٹھ ماویرکس کی جیت

لکھنؤ، 20 اگست (یو این آئی) کپتان رنکو سنگھ کی طوفانی نصف سنچری کی بدولت میرٹھ ماویرکس نے بدھ کی شب بارش سے متاثرہ یوپی ٹی-20 لیگ سیزن-4 کے مقابلے میں لکھنؤ فالکنز کو ڈکورتھ لوئس ضابطے (ڈی ایل ایس) طریقے سے پانچ رنز سے شکست دے دی۔
اٹل بہاری واجپئی اکانا اسٹیڈیم میں پہلے بلے بازی کرتے ہوئے لکھنؤ فالکنز نے 183 رنز بنائے۔ جواب میں میرٹھ ماویرکس نے 16.5 اوورز میں 6 وکٹ پر 154 رنز بنائے، لیکن مسلسل بارش کے باعث ڈی ایل ایس طریقے سے میرٹھ کو فاتح قرار دیا گیا۔
لکھنؤ کی جانب سے محمد سیف نے 32 گیندوں پر 45 رنز جبکہ اجیت ورما نے 37 گیندوں پر 8 چوکوں اور ایک چھکے کی مدد سے 53 رنز بنائے۔ میرٹھ کی جانب سے زیشان انصاری اور وجے کمار نے دو، دو وکٹیں حاصل کیں۔
184 رنز کے ہدف کے تعاقب میں میرٹھ نے ابتدا میں تین وکٹیں جلد گنوا دیں، تاہم دِویانش جوشی اور دِویانش راجپوت نے 52 رنز کی شراکت داری کرکے اننگز سنبھالی۔ ان کے آؤٹ ہونے کے بعد کپتان رنکو سنگھ نے محاذ سنبھالا اور 24 گیندوں پر دو چوکوں اور چار چھکوں کی مدد سے ناٹ آؤٹ 55 رنز بنائے۔
بارش کے باعث میچ کا فیصلہ ڈی ایل ایس اسکور پر منحصر ہوگیا۔ 16.3 اوورز کے بعد میرٹھ مقررہ ڈی ایل ایس اسکور سے ایک رن پیچھے تھا، لیکن رنکو نے چھکا لگا کر ٹیم کو آگے کردیا۔ اس کے بعد انہوں نے نوینت کمار کے 17ویں اوور میں پانچ گیندوں پر 26 رنز جوڑ کر میرٹھ کی جیت تقریباً یقینی بنائی۔