یومِ آزادی کے موقع پر ‘وندے ماترم’ کی بے حرمتی کرنے پر ملک سے معافی مانگے کانگریس: بی جے پی

نئی دہلی، 15 اگست (یو این آئی) بھارتیہ جنتا پارٹی (بی جے پی) نے کانگریس پر ملک کی آزادی کے دن قومی گیت ‘وندے ماترم’ کی بے حرمتی کرنے کا الزام لگاتے ہوئے ملک سے معافی مانگنے کا مطالبہ کیا ہے۔
بی جے پی کے قومی ترجمان سدھانشو تریویدی نے ہفتے کے روز صحافیوں سے بات کرتے ہوئے کہا کہ آج پورا ملک جوش و خروش اور خوشی کے ساتھ یومِ آزادی منا رہا ہے۔ آج کے یومِ آزادی کے ساتھ ایک اور کامیابی جڑ گئی ہے۔ آج پہلی بار یومِ آزادی کے موقع پر لال قلعے پر قومی گیت ‘وندے ماترم’ گایا گیا، لیکن آج کے ہی دن کانگریس پارٹی نے اس گیت کی بے حرمتی کی۔
انہوں نے کہا، "ہم نے آج کانگریس ہیڈکوارٹر میں ایک بہت ہی عجیب، متنازع اور افسوسناک منظر دیکھا۔ کانگریس دفتر میں جب ‘وندے ماترم’ گیت گایا جا رہا تھا، ٹھیک اسی وقت کانگریس کی اعلیٰ رہنما سونیا گاندھی، پارٹی کے سابق صدر راہل اور موجودہ صدر ملکارجن کھرگے بہت ہی عجیب اور قابلِ اعتراض طریقے سے بے حرمتی کرتے ہوئے آپس میں بات چیت کرتے اور کسی کو بلاتے ہوئے دکھائی دیے۔”
انہوں نے کہا کہ کوئی شخص انہیں کچھ بتانے کے لیے ان کے پاس آ بھی رہا تھا اور وہ آپس میں اشارے کر رہے تھے۔ یہ قومی گیت ‘وندے ماترم’ کی توہین ہے اور اس سے کروڑوں ہندوستانیوں کے جذبات کو شدید ٹھیس پہنچی ہے۔ اس سے پتہ چلتا ہے کہ کانگریس پارٹی شاید ابھی بھی قومی گیت ‘وندے ماترم’ کو پوری طرح سے قبول نہیں کر پائی ہے۔
مسٹر تریویدی نے کہا، "ہم کانگریس کی اعلیٰ قیادت کے اس رویے کی مذمت کرتے ہیں اور امید کرتے ہیں کہ کانگریس پارٹی اس کے لیے ملک سے معافی مانگے گی اور وضاحت دے گی کہ انہوں نے ایسا رویہ کیوں اپنایا؟” انہوں نے کہا کہ اگر کانگریس ایسا نہیں کرتی ہے، تو یہ آئین کے تئیں ان کی سچی وفاداری، جدوجہدِ آزادی کے تئیں ان کے احترام اور کروڑوں ہندوستانیوں کی عزت و وقار میں ان کے اعتماد پر سنجیدہ سوالات کھڑے کرتا ہے۔
انہوں نے کہا کہ ہندوستان کی جدوجہدِ آزادی کا انقلابی گیت گاتے ہوئے لاکھوں لوگوں نے لاٹھیاں اور گولیاں کھائیں، ہزاروں لوگ پھانسی کے پھندے پر جھولے اور جسے کانگریس نے اقتدار کی سہولت اور اقتدار کی لالچ میں تسکین اور انتہا پسند طاقتوں کے آگے قربان کر دیا اور اسے گھٹا کر صرف ایک چوتھائی کر دیا، لیکن وزیر اعظم مسٹر نریندر مودی کے عزم اور کروڑوں ہندوستانیوں کے جذبات کو مدنظر رکھتے ہوئے، یہ پہلا یومِ آزادی ہے جب ‘وندے ماترم’ کو اس کی مکمل شکل میں گایا گیا ہے۔