مغربی ریلوے کے گیرات پور-احمد آباد ریل سیکشن میں 153 کروڑ روپے کی لاگت سے بنے گا فور لین پل

نئی دہلی، 12 اگست (یو این آئی) سڑک آمد و رفت کو آسان اور محفوظ بنانے کے لیے ریلوے نے گجرات میں گیرات پور-احمد آباد ریل سیکشن پر روڈ اوور برج (آر او بی) بنانے کا فیصلہ کیا ہے۔
یہ فور لین آر او بی مغربی ریلوے کے گیرات پور-احمد آباد ریل سیکشن پر لیول کراسنگ نمبر 305 پر بنایا جائے گا۔ اس کے لیے ریلوے نے 153 کروڑ روپے کے منصوبے کو منظوری دی ہے۔ ریلوے نے بدھ کے روز بتایا کہ یہ منصوبہ ریلوے کے اوپری اور زیرِ زمین پل، فٹ اوور برج بنانے اور ڈرینج (پانی کی نکاسی) میں بہتری لانے کے اقدام کا حصہ ہے۔
ریلوے کے مطابق یہ کراسنگ گھنی آبادی والے شہری علاقے میں ہے، جس کے لیے طویل اپروچ اور بڑے ڈھانچے کی ضرورت ہے۔ ریلوے پل والے حصے کی کل لمبائی 106 میٹر ہوگی۔ اس میں 53-53 میٹر کے دو کمپوزٹ گرڈر ہوں گے۔ اس کے بعد 150 میٹر کا وایاڈکٹ (پل نما ڈھانچہ) ہوگا۔ ریلوے اپروچ 595 میٹر تک پھیلی ہوگی۔
ریلوے کا یہ نیا آر او بی بننے سے سڑک استعمال کرنے والوں کو لیول کراسنگ پر انتظار نہیں کرنا پڑے گا۔ اس سے ریلوے لائن کے آر پار گاڑیوں کی آمد و رفت بغیر کسی رکاوٹ کے ہر وقت ہو سکے گی۔ علاقے میں سڑک استعمال کرنے والوں کو محفوظ راستہ ملے گا، سفر کا وقت کم ہوگا اور کراسنگ پر لگنے والے جام سے راحت ملے گی۔
ریلوے نے کہا کہ یہ منصوبہ لیول کراسنگ کو ختم کرنے، عوام کی حفاظت کو بہتر بنانے اور ملک بھر میں جدید و موثر ٹرانسپورٹ بنیادی ڈھانچہ تیار کرنے کے لیے بھارتی ریلوے کے مسلسل عزم کو ظاہر کرتا ہے۔