صدر بازار ترنگے کے رنگ میں ڈوب گیا ، ترنگا مارچ میں امڈا حب الوطنی کا عوامی سیلاب

نئی دہلی، 12 اگست (یو این آئی) وزیراعظم مسٹر نریندر مودی کے "ہر گھر ترنگا” مہم سے متاثر ہو کر صدر بازار میں سینئر تاجر رہنما اور صدر بازار باری مارکیٹ ٹریڈز ایسوسی ایشن کے صدر پرم جیت سنگھ پما کی صدارت میں شاندار ترنگا مارچ کا اہتمام کیا گیا  صدر بازار کے سینکڑوں تاجروں نے ہاتھوں میں ترنگا لے کر پورے جوش و خروش کے ساتھ مارچ میں حصہ لیا پرم جیت سنگھ پما نے بتایا کہ ترنگا مارچ قطب روڈ، تیلی واڑہ چوک، صدر بازار سے شروع ہو کر قطب روڈ چوک اور صدر بازار مین مارکیٹ سے ہوتے ہوئے 12 توٹی چوک پر اختتام پذیر ہوا۔
مارچ کے دوران "ہر گھر ترنگا، ہر دکان ترنگا”، "بھارت ماتا کی جے”، "وندے ماترم” اور "انقلاب زندہ باد” کے نعروں سے پورا صدر بازار گونج اٹھا۔ مارچ کے اگلے حصے میں ڈھول نگاڑوں کی گونج اور حب الوطنی کے نغموں نے پورے ماحول کو حب الوطنی سے سرشار کر دیا۔ تاجروں، مقامی شہریوں اور نوجوانوں نے بھی جوش و خروش سے ترنگا لہرا کر مارچ میں اپنی شرکت درج کرائی۔
ترنگا مارچ میں فیڈریشن آف صدر بازار ٹریڈز ایسوسی ایشن (فیسٹا) کے صدر راکیش کمار یادو، کنفیڈریشن آف صدر بازار ٹریڈرز ایسوسی ایشن کے جنرل سکریٹری دیوراج بویجا، فیسٹا کے شریک کنوینر پون کھنڈیل وال، جنرل سکریٹری کنول کمار اور خزانچی دیپک متل، اس موقع پر تاجر رہنما دوندر جین، جسوندر سنگھ، وریندر اروڑہ، بھوپیندر سنگھ، ہرجیت سنگھ چھابڑا سمیت متعدد تاجر رہنماؤں نے حصہ لیا۔
اس موقع پر پرم جیت سنگھ پما نے کہا کہ ترنگا صرف ایک پرچم نہیں بلکہ ہندوستان کی پہچان، اتحاد، سالمیت اور کروڑوں اہل وطن کے وقار کی علامت ہے۔ "ہر گھر ترنگا” مہم ملک کے ہر شہری کو حب الوطنی اور قومی فرائض کے تئیں بیدار کرنے کا ایک مؤثر ذریعہ بن رہی ہے۔
مسٹر پما نے کہا کہ صدر بازار کے تاجروں نے جس جوش اور جذبے کے ساتھ ترنگا مارچ میں حصہ لیا، وہ اس بات کا ثبوت ہے کہ حب الوطنی صرف لفظوں تک محدود نہیں ہے بلکہ یہ ہماری زندگی اور اقدار کا لازمی حصہ ہے۔ انہوں نے کہا کہ ہر شہری کو قومی پرچم کے احترام اور قومی مفاد کو ہمیشہ مقدم رکھنا چاہیے۔
خاص بات یہ رہی کہ پورے صدر بازار کو ترنگوں سے پرکشش انداز میں سجایا گیا تھا۔ پورا بازار حب الوطنی کے رنگ میں رنگا ہوا نظر آ رہا تھا۔ جگہ جگہ تاجروں اور مقامی لوگوں نے ترنگا مارچ پر پھول برسا کر اور ترنگا لہرا کر شاندار استقبال کیا۔ بازار کے مختلف حصوں میں حب الوطنی کا جوش دیکھتے ہی بنتا تھا۔
شاندار ترنگا مارچ کے کامیاب انعقاد نے صدر بازار میں حب الوطنی، اتحاد، سماجی ہم آہنگی اور قومی وقار کا ایک مثال قائم کرنے والا پیغام دیا۔
پروگرام میں باری مارکیٹ کے سینئر نائب صدر وریندر آریہ، کلدیپ سنگھ، نائب صدر سنیل پوری، راجیش کمار، سندیپ کھنہ، جنرل سکریٹری رمیش سچدیوا، دیپک نمبھل، سچن گگن کھنہ، ترون سونی، ابھے سبھر وال سمیت بڑی تعداد میں تاجر موجود تھے۔