ایشین جونیئر اوپن اور گرلز شطرنج چیمپئن شپ میں 10 ممالک کے 157 کھلاڑی حصہ لیں گے

ممبئی، 12 اگست (یواین آئی) مہاراشٹر چیس ایسوسی ایشن (ایم سی اے) کی میزبانی میں 16 سے 26 اگست تک ہونے والی ایشین جونیئر شطرنج چیمپئن شپ 2026 میں 10 ممالک کے 157 کھلاڑی حصہ لیں گے، جن میں چھ انٹرنیشنل ماسٹرز اور 24 فِڈے ماسٹرز و ویمن فِڈے ماسٹرز شامل ہیں۔
آج یہاں منعقدہ پریس کانفرنس میں ایف سی اے کے صدر پرینے فوکے، ٹورنامنٹ ڈائریکٹر نرنجن گودبولے اور آرگنائزنگ سیکریٹری سلیل گھاٹے نے یہ اعلان کیا۔ ایشیا کے ٹاپ انڈر-20 کھلاڑیوں پر مشتمل اس ٹورنامنٹ میں کلاسیکل سوئس فارمیٹ کے نو راؤنڈ کے علاوہ ریپڈ اور بلٹز کے سات، سات راؤنڈ بھی ہوں گے۔
آل انڈیا چیس فیڈریشن، ایشین چیس فیڈریشن اور فِڈے کی نگرانی میں ہونے والا یہ ٹورنامنٹ ممبئی کے آئی ٹی سی مراٹھا میں کھیلا جائے گا۔
یہ مقام ملک کے جونیئر کھلاڑیوں کے درمیان خاصا مقبول ہے۔ یہاں پہلے وشواناتھن آنند، ابھجیت کنٹے اور تیجس باکرے (مردوں میں) جبکہ تانیا سچدیو، کونیرو ہمپی اور ایوانا فرٹاڈو (خواتین میں) جیسے معروف کھلاڑی کامیابی حاصل کرچکے ہیں۔
مقابلے کے فاتحین میں اگر کوئی آئی ایم ہے تو اسے گرینڈ ماسٹر نارم ملے گا، جبکہ آئی ایم نہ ہونے والے کھلاڑیوں کو آئی ایم نارم حاصل ہوگا۔ کلاسیکل سوئس فارمیٹ میں 157، ریپڈ میں 153 اور بلٹز میں 151 کھلاڑی حصہ لیں گے۔ اوپن سیکشن کے کھلاڑیوں کی اوسط ایلو ریٹنگ 2054، جبکہ جونیئر خواتین سیکشن کی اوسط ایلو ریٹنگ 1885 ہے۔