سن رائزرس لیڈز کی شکست سے ایم آئی لندن کو ایلیمینیٹر میں پہنچنے کا موقع

لندن، 12 اگست (یواین آئی) سن رائزرس لیڈز کو منگل کی شب مانچسٹر سپر جائنٹس کے ہاتھوں بڑی شکست کا سامنا کرنا پڑا، جس کے بعد دی ہنڈریڈ مردوں کے مقابلے میں اس کے اچانک باہر ہونے کا خطرہ پیدا ہوگیا ہے۔ سن رائزرس کی شکست نے ایم آئی لندن کے لیے بہتر نیٹ رن ریٹ کے ساتھ ایلیمینیٹر میں جگہ بنانے کا موقع پیدا کردیا ہے۔
اپنے آخری لیگ میچ سے قبل سن رائزرس لیڈز فائنل میں پہنچنے کی امید رکھتی تھی، لیکن ٹم سیفرٹ کی 40 گیندوں پر ناٹ آؤٹ 80 رنز کی شاندار اننگز کی بدولت سپر جائنٹس نے 128 رنز کا ہدف 33 گیندیں باقی رہتے حاصل کرلیا۔ اس کے بعد سن رائزرس نیٹ رن ریٹ کی بنیاد پر تیسرے اور سپر جائنٹس دوسرے نمبر پر پہنچ گیا۔ ٹرینٹ راکٹس سرفہرست ہے اور پہلے ہی فائنل میں جگہ بناچکا ہے۔
سن رائزرس اور سپر جائنٹس کے 20، 20 پوائنٹس ہیں، جبکہ ان کے فوراً بعد ایم آئی لندن اور ویلش فائر 16، 16 پوائنٹس کے ساتھ موجود ہیں۔ تاہم انتہائی خراب نیٹ رن ریٹ کے باعث ویلش فائر کی امیدیں تقریباً ختم ہوچکی ہیں۔
حالیہ شکست کے بعد سن رائزرس کا نیٹ رن ریٹ 1.094 سے کم ہوکر 0.602 رہ گیا ہے۔ ایم آئی لندن کا نیٹ رن ریٹ 0.262 ہے، اس لیے اسے سن رائزرس کو پیچھے چھوڑنے کے لیے بہت بڑی کامیابی حاصل کرنا ہوگی۔ اگر ایم آئی لندن پہلے بلے بازی کرتا ہے تو اسے فینکس کو کم از کم 59 رنز سے شکست دینا ہوگی۔
اگر ایم آئی لندن پہلے گیند بازی کرتا ہے تو اسے ہدف کم از کم 35 گیندیں باقی رہتے حاصل کرنا ہوگا۔ اگر فینکس کا اسکور کم رہتا ہے یا ایم آئی لندن برابری کے اسکور پر چوکا لگا کر میچ ختم کرتا ہے تو اسے ایک، دو گیندوں کی اضافی گنجائش مل سکتی ہے۔
اگر ایم آئی لندن اس میچ سے چار پوائنٹس حاصل نہیں کرپاتا تو سن رائزرس براہ راست ایلیمینیٹر میں پہنچ جائے گا۔
تین ٹیموں کے پہلے ہی 20 یا اس سے زیادہ پوائنٹس ہونے کے باعث ویلش فائر عملی طور پر مقابلے سے باہر ہوچکا ہے۔ وہ اپنا آخری لیگ میچ لندن اسپرٹ کے خلاف جیت بھی جائے تو اس کا نیٹ رن ریٹ منفی 1.001 ہے، جبکہ سن رائزرس کا 0.602 ہے۔ ایک ہی میچ میں اس فرق کو ختم کرنا تقریباً ناممکن ہے۔