برلا نے تمام پارٹیوں سے ایوان کی کارروائی باقاعدگی سے چلانے کی اپیل کی

نئی دہلی، 11 اگست (یو این آئی) لوک سبھا اسپیکر اوم برلا نے پیر کو تمام سیاسی پارٹیوں کے لیڈروں سے ایوان میں جاری تعطل کو ختم کرنے اور کارروائی باقاعدگی سے چلانے میں تعاون کرنے کی اپیل کی۔
مسٹر برلا نے بزنس ایڈوائزری کمیٹی (بی اے سی) کی میٹنگ کے دوران ایوان میں بار بار ہو رہے خلل پر تشویش کا اظہار کرتے ہوئے بتایا کہ پارلیمنٹ عوام کے مسائل اٹھانے، ان پر بحث کرنے اور ان کے حل کا اہم پلیٹ فارم ہے۔ ذرائع کے مطابق، لوک سبھا اسپیکر نے پارٹیوں کے لیڈروں سے کہا کہ ایوان کی کارروائی چلنے دی جائے، تاکہ وقفہ سوالات میں اراکینِ اسمبلی اپنے علاقوں اور عوام سے جڑے امور حکومت کے سامنے اٹھا سکیں اور اہم بلوں نیز مفاد عامہ کے موضوعات پر معنی خیز بحث ہو سکے۔ انہوں نے بتایا کہ عوام سے جڑے مسائل کو التوا میں نہیں رکھا جا سکتا۔ ان مسائل کو ایوان میں اٹھایا جانا چاہیے، ان پر وسیع بحث ہونی چاہیے اور حل نکالنے کی کوشش کی جانی چاہیے۔
مسٹر برلا نے پارلیمانی جمہوریت میں تعمیری بحث، تمام اراکین کی معنی خیز شرکت اور پارلیمانی روایتوں کی پاسداری کو ضروری بتایا۔ انہوں نے بتایا کہ سیاسی اختلافات جمہوریت کا فطری حصہ ہیں اور انہیں بحث و مباحثے کے ذریعے ظاہر کیا جا سکتا ہے، لیکن اس سے ایوان کی کارروائی متاثر نہیں ہونی چاہیے۔ انہوں نے تمام پارٹیوں سے ایوان کے وقار اور جمہوری روایتوں کو برقرار رکھنے میں تعاون کرنے کی درخواست کی۔
واضح رہے کہ 20 جولائی سے شروع ہوا مانسون سیشن 13 اگست تک چلنا ہے۔ سیشن کے دوران نیٹ-یو جی تنازعہ سمیت مختلف امور پر اپوزیشن کی مخالفت اور بحث کے مطالبے کی وجہ سے ایوان کی کارروائی مسلسل متاثر ہوئی ہے۔ ایسے میں سیشن کے بقایا دنوں کا موثر استعمال کرنے نیز التوا میں پڑے قانون سازی کے کاموں اور مفاد عامہ کے مسائل پر وافر بحث کو یقینی بنانے کے لیے اسپیکر نے تمام پارٹیوں سے تعاون کی درخواست کی ہے۔