اکاسا ایئر نے چوتھی سالگرہ پر اپنا لائلٹی پروگرام اکاسا ایلیویٹ متعارف کرایا

نئی دہلی، 7 اگست (یواین آئی) نئی فضائی کمپنی اکاسا ایئر نے جمعہ کے روز اپنی چوتھی سالگرہ کے موقع پر اپنا نیا لائلٹی پروگرام اکاسا ایلیویٹ (Akasa Elevate) متعارف کرایا۔
ایئرلائن کی جانب سے جاری پریس ریلیز میں کہا گیا ہے کہ اس پروگرام کو صارفین کو زیادہ قدر، ذاتی شناخت اور بہتر سفری سہولیات فراہم کرنے کے مقصد سے تیار کیا گیا ہے۔
اکاسا ایلیویٹ کے تحت اراکین اہل پروازوں کے ساتھ ساتھ اضافی مصنوعات اور خدمات پر ایلیویٹ پوائنٹس حاصل کر سکیں گے۔ اس کے علاوہ انہیں نشست کے انتخاب، اضافی سامان (بیگیج)، کھانے، ترجیحی خدمات اور زیادہ لچکدار سفری سہولیات جیسے متعدد فوائد بھی حاصل ہوں گے۔
اس موقع پر اکاسا ایئر کے بانی اور چیف ایگزیکٹو آفیسر ونئے دوبے نے کہاکہ”اکاسا ایئر کے چار سال مکمل ہونے پر ہم ان لاکھوں صارفین کے بے حد شکر گزار ہیں جنہوں نے ہمارے ساتھ سفر کرنے کا انتخاب کیا۔ ان کا اعتماد اور وفاداری ہماری ترقی کی بنیاد رہے ہیں اور انہوں نے ہمیں مسلسل اکاسا کے سفری تجربے کو مزید بہتر بنانے کی ترغیب دی ہے۔”
انہوں نے کہا کہ اس پروگرام کو سادہ، سب کے لیے قابلِ رسائی اور حقیقی معنوں میں فائدہ مند بنانے کے مقصد سے ڈیزائن کیا گیا ہے۔ اس کے تحت اراکین اپنی پہلی ہی پرواز سے فوائد حاصل کرنا شروع کر سکتے ہیں اور انہیں تیزی اور آسانی کے ساتھ اعلیٰ درجے (ہائی ٹئیر) اور خصوصی شناخت حاصل کرنے کا موقع ملے گا۔
مسٹر دوبے نے مزید کہا کہ جیسے جیسے ایئرلائن اپنے پانچویں سال میں داخل ہو رہی ہے، اس کی توجہ منظم ترقی، آپریشنل عمدگی، ملازمین کو ترجیح دینے اور صارفین کو منفرد اور بہتر سفری تجربہ فراہم کرنے پر مرکوز رہے گی۔
قابلِ ذکر ہے کہ اکاسا ایئر نے اگست 2022 میں اپنی پروازوں کا آغاز کیا تھا۔ اس وقت کمپنی کے بیڑے میں 40 سے زائد طیارے شامل ہیں۔