گاڑیوں کی خردہ فروخت نے بنایا جولائی کا نیا ریکارڈ

نئی دہلی، 6 اگست (یو این آئی) گزشتہ سال ستمبر سے گاڑیوں کی فروخت میں جاری تیزی جولائی میں بھی برقرار رہی، جہاں خوردہ فروخت نے تمام زمروں میں نیا ریکارڈ قائم کیا۔
آٹو موبائل ڈیلرز کے مہاسنگھ ‘فاڈا’ کی جانب سے جمعرات کے روز جاری کردہ اعداد و شمار کے مطابق جولائی میں ملک میں کل 25,91,138 گاڑیاں فروخت ہوئیں جو گزشتہ سال جولائی کے مقابلے میں 25.89 فی صد زیادہ ہیں۔ تاہم یہ تعداد اس سال جون کے 25,95,262 کے مقابلے میں معمولی کمی کو ظاہر کرتی ہے۔
فاڈا کے نائب صدر سائی گردھر نے کہا کہ ایسا پہلی بار ہوا ہے کہ ہر زمرے ، مسافر گاڑیاں، دو پہیہ، سہ پہیہ، تجارتی گاڑیاں، ٹریکٹر نے جولائی کی فروخت کا نیا ریکارڈ قائم کیا ہے۔ انہوں نے کہا کہ جنوری 2014 سے 151 مہینوں میں سب سے زیادہ فروخت کے معاملے میں جولائی 2026 بارہویں نمبر پر رہا ہے۔ اس فہرست میں اس سے زیادہ فروخت والے تمام مہینے تہواروں کے دنوں کے ہیں۔
گاڑیوں کی رجسٹریشن کی بنیاد پر جاری کردہ ان اعداد و شمار کے مطابق، مسافر گاڑیوں کی فروخت جولائی میں سالانہ 19 فی صد بڑھ کر 4,16,555 یونٹ پر پہنچ گئی۔ دو پہیہ گاڑیوں کی فروخت میں 28 فی صد کا اضافہ ہوا اور یہ 18,18,289 یونٹ درج کی گئی۔ مسٹر گردھر نے کہا کہ ماہانہ بنیادوں پر شہری علاقوں میں دو پہیہ گاڑیوں کی فروخت 5.04 فی صد بڑھی ہے جب کہ دیہی علاقوں میں اس میں 6.16 فی صد کی کمی رہی ہے۔ انہوں نے کہا کہ اس کی اہم وجہ مغربی اور وسطی ہند میں غیر متوقع بارش، سیلاب کی صورتحال رہی۔
تجارتی گاڑیوں کی فروخت 24 فی صد بڑھ کر 99,666 یونٹ پر رہی۔ سہ پہیہ گاڑیوں کی فروخت 16 فی صد بڑھ کر 1,33,778 یونٹ پر پہنچ گئی۔ ٹریکٹروں کی فروخت میں 28 فی صد کا اضافہ ہوا اور یہ 1,17,349 یونٹ ہو گئی۔ تعمیراتی سامان کی فروخت بھی 46 فی صد بڑھ کر 5,501 یونٹ تک پہنچ گئی۔
فاڈا نے بتایا کہ اگست 2026 کے لیے ڈیلرز کافی پرامید ہیں۔ 74.3 فی صد ڈیلرز اگست میں فروخت بڑھنے کی امید کر رہے ہیں۔ اس نے بتایا کہ 22.9 فی صد کا ماننا ہے کہ مارکیٹ میں استحکام رہے گا جبکہ 2.8 فی صد ڈیلرز فروخت میں کمی کی توقع کر رہے ہیں۔