مودی اور شاہ ایوان میں آ کر جواب دیں: کھرگے

نئی دہلی، 05 اگست (یو این آئی) پارلیمنٹ کی کارروائی شروع ہونے سے پہلے بدھ کے روز پارلیمنٹ کے احاطے میں اپوزیشن اراکینِ پارلیمنٹ نے مارچ نکال کر وزیر اعظم نریندر مودی اور وزیر داخلہ امت شاہ سے ایوان میں آ کر اپوزیشن کے سوالات کا جواب دینے اور اس مسئلے پر بحث کرانے کا مطالبہ کیا۔
راجیہ سبھا میں قائدِ حزبِ اختلاف ملکارجن کھرگے نے کہا کہ ان کا مطالبہ ہے کہ وزیر اعظم مودی اور وزیر داخلہ شاہ ایوان میں آئیں، بیان دیں اور حکومت اس مسئلے پر بحث کرائے۔ بحث سے ہی حل نکلے گا۔ مسٹر کھرگے نے کہا کہ مسٹر شاہ جس عہدے پر ہیں، اس عہدے کی عوام کے کے لیے ذمہ داریاں ہیں اور ملک جمہوریت سے چلتا ہے، کسی کے راج دربار سے نہیں۔
کانگریس کی جنرل سکریٹری پرینکا گاندھی واڈرا نے کہا کہ طلباء پر گولیاں چلائی گئیں، پیلٹ گن اور آنسو گیس کے گولے داغے گئے نیز لاٹھی چارج کیا گیا۔ انہوں نے کہا کہ اگر یہ سب ہوا ہے تو اس کی ذمہ داری مسٹر شاہ کو لینی چاہیے۔ انہوں نے یہ بھی کہا کہ پارلیمنٹ کا سیشن شروع ہوئے کئی دن ہو چکے ہیں لیکن مسٹر مودی ایوان میں نہیں آ رہے ہیں، جو پارلیمنٹ کی توہین ہے۔