کہاصرف۱۲ دنوں میں یاتریوں کی تعداد۳ لاکھ سے تجاوز کر گئی
ڈی آئی پی آر
جموں؍۱۵ جولائی
جموں و کشمیر کے لیفٹیننٹ گورنر‘ منوج سنہا نے آج جموں کے بھگوتی نگر یاتری نواس کا دورہ کرکے جاری شری امرناتھ جی یاترا کے لیے فراہم کی جا رہی سہولیات اور خدمات کا تفصیلی جائزہ لیا۔
اس موقع پر لیفٹیننٹ گورنر نے جموں و کشمیر پولیس، فوج، نیم فوجی دستوں، شری امرناتھ جی شرائن بورڈ اور سول انتظامیہ کے افسران سے ملاقات کی اور یاتریوں کی آرام دہ قیام و طعام، رجسٹریشن، آمد و رفت اور دیگر انتظامات کا جائزہ لیا۔ انہوں نے متعلقہ افسران کی محنت اور خدمات کو سراہتے ہوئے ہدایت دی کہ ہر یاتری کے ساتھ ایک معزز اور مقدس مہمان کی طرح برتاؤ کیا جائے۔
سنہا نے کہا ’’مقدس یاترا کے آغاز کے صرف بارہ دنوں میں یاتریوں کی تعداد تین لاکھ سے تجاوز کر چکی ہے، اس لیے تمام زائرین کو ہموار، محفوظ اور بلا رکاوٹ سہولیات فراہم کرنا ہماری اولین ترجیح ہے‘‘۔
ایل جی نے بابا برفانی کے تمام عقیدت مندوں کے لیے رجسٹریشن کے عمل کو مزید مؤثر، رہائش کو آرام دہ اور سفری انتظامات کو مکمل طور پر منظم رکھنے کی ہدایت دی۔
لیفٹیننٹ گورنر نے جموں ڈویژن کی مذہبی اور سیاحتی اہمیت کو اجاگر کرنے پر بھی زور دیتے ہوئے حکام کو ہدایت دی کہ یاتریوں کے لیے جموں ڈویژن کے اہم مذہبی مقامات اور سیاحتی مقامات کے سیر و سیاحت کے خصوصی پروگرام ترتیب دیے جائیں۔ ساتھ ہی مقامی دستکاری اور ہینڈلوم مصنوعات کی مؤثر تشہیر بھی یقینی بنائی جائے۔
لیفٹیننٹ گورنر نے کہا’’ہماری خواہش ہے کہ جب بھی بابا امرناتھ کے یاتری اپنے گھروں کو واپس جائیں تو وہ اپنے ساتھ جموں کی خوبصورت دست ساز مصنوعات اور یہاں کی خوشگوار یادیں بھی لے کر جائیں۔ ہم سب مل کر اس سال کی یاترا کو تاریخی بنانے کے لیے پُرعزم ہیں‘‘۔
ایل جی نے کمیونٹی کچنوں میں تعینات فوڈ سیفٹی افسران کی کارکردگی، استقبالیہ اور قیام گاہوں کی سہولیات، موقع پر رجسٹریشن، ٹرانسپورٹ اور سکیورٹی انتظامات کا بھی جائزہ لیا۔
سنہا نے حکام کو ہدایت دی کہ یاترا کے دوران یاتریوں کی مسلسل بڑھتی ہوئی تعداد کے پیش نظر افرادی قوت کی تعیناتی کو مؤثر انداز میں منظم کیا جائے تاکہ کسی بھی مرحلے پر انتظامات متاثر نہ ہوں۔
انہوں نے مزید کہا کہ محکمہ موسمیات کی پیش گوئیوں پر مسلسل نظر رکھی جائے اور موسم میں کسی بھی اچانک تبدیلی سے نمٹنے کے لیے تمام متعلقہ ادارے ہر وقت چوکس رہیں۔
اجلاس کے دوران ڈویژنل کمشنر جموں رمیش کمار نے یاترا کے دوران دھوکہ دہی اور جعلسازی میں ملوث افراد کے خلاف کی گئی قانونی کارروائی سے لیفٹیننٹ گورنر کو آگاہ کیا۔ اس پر منوج سنہا نے ہدایت دی کہ اگر کوئی سرکاری اہلکار بھی بدعنوانی یا غیر قانونی سرگرمیوں میں ملوث پایا جائے تو اس کے خلاف بھی سخت انتظامی اور قانونی کارروائی عمل میں لائی جائے۔
بعد ازاں لیفٹیننٹ گورنر نے شری امرناتھ جی یاترا پر آئے ہوئے عقیدت مندوں سے ملاقات کی، ان کی خیریت دریافت کی اور ان کیلئے محفوظ، پُرامن اور بابرکت یاترا کی دعا کی۔
