ایجنسیاں
رام بن؍۱۳ جولائی
رام بن ضلع کے چندرکوٹ علاقے میں پیر کے روز متعدد گاڑیوں کے درمیان ہونے والے تصادم میں امرناتھ یاترا پر جانے والے۱۸یاتری معمولی زخمی ہو گئے۔
ڈپٹی کمشنر رام بن نے بتایا کہ حادثہ چندرکوٹ کے لنگر پوائنٹ پر اس وقت پیش آیا جب پہلگام جانے والے یاترا قافلے میں شامل جے کے آر ٹی سی کی دو بسیں آپس میں ٹکرا گئیں۔ تصادم کی شدت کے باعث ایک بس سامنے چل رہی ایک کار سے جا ٹکرائی، جس کے بعد کار ایک نجی بس سے ٹکرا گئی۔
انہوں نے بتایا کہ تمام زخمی یاتریوں کو فوری طور پر ضلع اسپتال رام بن منتقل کیا گیا، جہاں ان کا علاج جاری ہے۔
ڈپٹی کمشنر کے مطابق تمام زخمیوں کی حالت مستحکم ہے اور انہیں معمولی نوعیت کی چوٹیں آئی ہیں۔
پولیس نے واقعے کا نوٹس لیتے ہوئے حادثے کی وجوہات معلوم کرنے کے لیے تحقیقات شروع کر دی ہے۔
اس دوران سخت حفاظتی انتظامات کے درمیان سالانہ شری امرناتھ یاترا کے بارہویں قافلے میں۷۷۵۴ عقیدت مند پیر کے روز جموں سے وادیٔ کشمیر میں واقع دونوں بیس کیمپوں کے لیے روانہ ہوئے۔
سرکاری حکام کے مطابق اب تک۲ لاکھ۵۲ ہزار سے زائد یاتری امرناتھ غار میں برف سے قدرتی طور پر تشکیل پانے والے شیو لنگم کے درشن کر چکے ہیں۔
حکام نے بتایا کہ پیر کو۳۰۳ گاڑیوں پر مشتمل قافلے میں مجموعی طور پر۷۷۵۴یاتری روانہ ہوئے، جن میں۵۳۸۳ مرد،۲۰۷۱ خواتین‘۲۲۲ سادھو،۵۸سادھویاں،۱۶ بچے اور۴خواجہ سرا (ٹرانس جینڈر) شامل ہیں۔ قافلہ سخت سکیورٹی حصار میں اپنی منزل کی جانب روانہ کیا گیا۔
