ایجنسیاں
جموں؍۱۱ جولائی
جموں کشمیر کے ضلع کٹھوعہ میں ایک پولیس کانسٹیبل کو ڈھائی سال سے زائد عرصے تک بغیر اجازت ڈیوٹی سے غیر حاضر رہنے پر ملازمت سے برطرف کر دیا گیا ہے۔
پولیس کے ایک ترجمان نے بتایا کہ سینئر سپرنٹنڈنٹ آف پولیس (ایس ایس پی) کٹھوعہ موہیتا شرما نے سلیکشن گریڈ کانسٹیبل بچن شرما ساکن گاؤں ڈھلوٹی، تحصیل مرہین، جو ڈسٹرکٹ پولیس لائنز (ڈی پی ایل) کٹھوعہ میں تعینات تھے، کو ملازمت سے برطرف کرنے کے احکامات جاری کیے ہیں۔
ترجمان کے مطابق مذکورہ اہلکار سال۲۰۱۱ میں جموں و کشمیر پولیس میں کانسٹیبل کے طور پر بھرتی ہوا تھا۔
ترجمان نے بتایا کہ ڈی پی ایل کٹھوعہ میں تعیناتی کے دوران۱۰ نومبر۲۰۲۳ سے وہ غیر حاضر پایا گیا۔ بار بار نوٹس جاری کیے جانے، وائرلیس پیغامات بھیجنے، راجباغ پولیس اسٹیشن کے ذریعے طلبی کے سمن جاری کرنے، شوکاز نوٹس دینے اور معروف اخبارات میں اشتہارات شائع کرنے کے باوجود وہ ڈیوٹی پر واپس حاضر نہیں ہوا۔
ترجمان نے کہا کہ اس سلسلے میں محکمانہ انکوائری کی گئی، جس میں وہ ڈھائی سال سے زائد عرصے تک دانستہ اور غیر مجاز غیر حاضری اور محکمانہ نظم و ضبط کی سنگین خلاف ورزی کا مرتکب پایا گیا۔
معاملے کی سنگینی کو مدنظر رکھتے ہوئے متعلقہ اہلکار کو۱۰ نومبر۲۰۲۳ سے، یعنی جس تاریخ سے وہ غیر حاضر قرار دیا گیا تھا، جموں و کشمیر پولیس کی ملازمت سے برطرف کر دیا گیا۔
۔۔۔۔۔۔
