ایجنسیاں
جموں؍۱۱ جولائی
جموں کشمیر پولیس نے منشیات کے خلاف اپنی کارروائیاں جاری رکھتے ہوئے ضلع ادھم پور میں ایک مبینہ منشیات فروش کو غیر قانونی منشیات اور نفسیاتی اثر رکھنے والے مادوں کی غیر قانونی تجارت کی روک تھام سے متعلق قانون کے تحت نظر بند کر دیا، جبکہ سانبہ، کٹھوعہ اور راجوری اضلاع میں منشیات سمیت گرفتار کیے گئے چار دیگر مبینہ منشیات فروشوں کو بھی حراست میں لیا گیا۔
پولیس کے ایک ترجمان نے بتایا کہ ضلع ادھم پور کے گاؤں پھلاتہ کے رہائشی سنجے کمار عرف سنجو کو پریوینشن آف الیسٹ ٹریفک اِن نارکوٹک ڈرگز اینڈ سائیکو ٹروپک سبسٹنسز ایکٹ کی دفعات کے تحت نظر بند کیا گیا ہے۔
ترجمان نے بتایا کہ اس’بدنام زمانہ منشیات فروش‘ کے خلاف نظر بندی کا حکم مجاز اتھارٹی نے جاری کیا تھا، جس پر جمعہ کے روز عمل درآمد کیا گیا۔ سنجے کمار کو ضلع جیل بھدرواہ (ڈوڈہ) منتقل کر دیا گیا ہے۔
پولیس ترجمان کے مطابق ضلع سانبہ کے علاقے گھگوال کے رہائشی انیل کمار کو اس کے گھر کے نزدیک موٹر سائیکل پر سفر کے دوران گرفتار کیا گیا، جس کے قبضے سے۱ء۷۲۰ کلو گرام پوست کا بھوسہ (پاپی اسٹرا) برآمد کیا گیا۔
اسی ضلع کے وجے پور علاقے میں ایک اور مبینہ منشیات فروش یوگیشور سنگھ کو اس وقت گرفتار کیا گیا جب اس کی کار کی تلاشی کے دوران۱۰ء۱۴ گرام ہیروئن برآمد ہوئی۔پولیس کے مطابق یوگیشور سنگھ اپنی آبائی بستی بگونہ سے قریبی مقام کی جانب جا رہا تھا۔ پولیس نے اس کی گاڑی بھی ضبط کر لی ہے۔
ضلع کٹھوعہ میں پولیس نے ہٹلی موڑ پر ایک گاڑی کی تلاشی کے دوران سندیپ کمار نامی مبینہ منشیات فروش کو گرفتار کر کے اس کے قبضے سے پانچ گرام ہیروئن برآمد کی۔
ادھر ضلع راجوری میں بھلا پل کے نزدیک پولیس نے نعیم نصیر عرف راجا کو گرفتار کیا، جس کے قبضے سے۲ء۶۳ گرام ہیروئن برآمد ہوئی۔
پولیس ترجمان نے بتایا کہ گرفتار کیے گئے چاروں افراد کے خلاف این ڈی پی ایس ایکٹ کے تحت مقدمات درج کر کے مزید تحقیقات شروع کر دی گئی ہیں۔
