ریکھا گپتا نے اندرلوک-اندرپرستھ میٹرو کوریڈور کے تعمیری کام کا کیا آغاز

نئی دہلی، 09 جولائی (یو این آئی) دہلی کی وزیر اعلیٰ ریکھا گپتا نے جمعرات کو دہلی میٹرو ریل کارپوریشن کے اندرلوک-اندرپرستھ میٹرو کوریڈور پروجیکٹ کے تعمیری کام کا آغاز کیا۔
محترمہ گپتا نے کہا کہ دہلی میٹرو صرف ایک ٹرانسپورٹ کا نظام نہیں، بلکہ ترقی یافتہ دہلی کا سنگ بنیاد ہے۔ راجدھانی میں میٹرو نیٹ ورک کی مسلسل توسیع شہریوں کو محفوظ، تیز رفتار، آسان اور ماحول دوست پبلک ٹرانسپورٹ فراہم کرنے کی سمت میں ایک تاریخی قدم ہے۔ انہوں نے کہا کہ وزیر اعظم نریندر مودی کی قیادت میں ملک بھر میں جدید اور عالمی معیار کے بنیادی ڈھانچے (انفراسٹرکچر) کی تیزی سے ترقی ہو رہی ہے۔ دہلی حکومت بھی اسی نظریے کے مطابق راجدھانی میں پبلک ٹرانسپورٹ کو مزید مضبوط بنانے کے لیے مرکزی حکومت اور دہلی میٹرو کے ساتھ تال میل کے ساتھ کام کر رہی ہے۔
وزیر اعلیٰ نے کہا کہ دہلی میٹرو کی مجینٹا لائن کے اندرلوک-اندرپرستھ کوریڈور سیکشن کی زیر زمین (انڈر گراؤنڈ) توسیع ہوگی۔ اس کوریڈور پر اندرلوک، دیا بستی، سرائے روہیلا، اجمل خان پارک، جھنڈے والان مندر، نبی کریم، نئی دہلی، دہلی گیٹ، دہلی سکریٹریٹ-آئی جی اسٹیڈیم اور اندرپرستھ سمیت کل 10 جدید زیر زمین میٹرو اسٹیشن بنائے جائیں گے۔ پروجیکٹ مکمل ہونے کے بعد مجینٹا لائن کی کل لمبائی تقریباً 89 کلومیٹر ہو جائے گی، جس سے یہ دہلی میٹرو کی سب سے لمبی لائن بن جائے گی۔ اس کے ساتھ ہی اس لائن پر سب سے زیادہ انٹرچینج اور زیر زمین اسٹیشن ہوں گے، جس سے راجدھانی کے مختلف حصوں کے درمیان سفر پہلے سے زیادہ تیز، آسان اور آرام دہ ہو جائے گا۔ وزیر اعلیٰ ریکھا گپتا نے کہا کہ دہلی میں میٹرو نیٹ ورک کی توسیع صاف ستھرے ماحول اور پائیدار ترقی کی سمت میں بھی ایک اہم پہل ہے۔ زیادہ سے زیادہ شہریوں کے پبلک ٹرانسپورٹ سے جڑنے پر نجی گاڑیوں پر انحصار کم ہوگا، جس سے ٹریفک جام، ایندھن کی کھپت اور کاربن کے اخراج میں کمی آئے گی۔ اس سے راجدھانی کی ہوا کے معیار میں بہتری آئے گی اور ماحولیاتی تحفظ کو بھی نئی مضبوطی ملے گی۔ دہلی حکومت کا مقصد راجدھانی کو عالمی معیار کا، جدید اور ماحول دوست پبلک ٹرانسپورٹ سسٹم فراہم کرنا ہے تاکہ ہر شہری کو محفوظ، آسان اور پائیدار آمد و رفت کی سہولت مل سکے۔