ایجنسیاں
جموں؍۲۷ جون
جموں و کشمیر کے ضلع ڈوڈہ میں ہفتہ کو ایک گاڑی سڑک سے پھسل کر گہری کھائی میں جا گری، جس کے نتیجے میں دو بزرگ افراد جاں بحق جبکہ چار دیگر زخمی ہوگئے۔
سرکاری ذرائع کے مطابق یہ حادثہ بھدرواہ کے بستی گاؤں کے قریب پیش آیا، جہاں ایک اندھے موڑ پر ڈرائیور گاڑی پر قابو کھو بیٹھا، جس کے باعث گاڑی سڑک سے نیچے گہری کھائی میں جا گری۔
مقامی لوگوں اور امدادی ٹیموں نے فوری کارروائی کرتے ہوئے تمام چھ افراد کو زخمی حالت میں نکال کر اسپتال منتقل کیا۔
ریسکیو کیے گئے افراد کی شناخت امام دین‘ زیتون بی بی‘ بشیر محمد ‘ معصوم بی‘ بدر دین اور۱۲سالہ یاسین کے طور پر ہوئی ہے۔
حکام نے بتایا کہ زیتون بی بی کو اسپتال پہنچنے پر مردہ قرار دیا گیا، جبکہ امام دین دورانِ علاج زخموں کی تاب نہ لاتے ہوئے چل بسے۔
چار دیگر زخمیوں کا اسپتال میں علاج جاری ہے، جبکہ پولیس نے حادثے کی وجوہات جاننے کے لیے مقدمہ درج کر کے تحقیقات شروع کر دی ہے۔
