نئی دہلی، 25 جون (یو این آئی) ڈیجیٹل گرفتاری کے گھوٹالوں (ڈیجیٹل اریسٹ اسکیم) میں ملوث سائبر مجرموں کے نیٹ ورکس کے خلاف ایک بڑی کارروائی میں، مرکزی تفتیشی بیورو (سی بی آئی) نے جمعرات کو ‘آپریشن چکر-VI’ کے تحت 16 ریاستوں میں 80 سے زیادہ مقامات پر مربوط تلاشی مہم چلائی اور چنئی اور کولکتہ سے دو ملزمان کو گرفتار کیا۔ ملزمان کی شناخت بی نریش اور سنجیب ساہا کے طور پر ہوئی ہے۔
یہ چھاپے آپریشن چکر-VI کے تحت مارے گئے۔ سی بی آئی نے 60 خصوصی ٹیمیں تشکیل دیں اور 16 ریاستوں یعنی پنجاب، گجرات، دہلی، مہاراشٹر، ہریانہ، تمل ناڈو، تلنگانہ، آندھرا پردیش، اتر پردیش، مدھیہ پردیش، راجستھان، آسام، مغربی بنگال، منی پور، کرناٹک اور اوڈیشہ میں 80 سے زیادہ مقامات پر مربوط تلاشی لی۔
سی بی آئی کے ایک سینئر افسر نے بتایا کہ یہ تلاشی ایک جاری تحقیقات کے حصے کے طور پر کی گئی جس کا مقصد ڈیجیٹل گرفتاری کے گھوٹالوں کے 200 سے زیادہ معاملات میں ملوث ایک ٹارگٹڈ آپریشنل نیٹ ورک کو مسمار کرنا ہے اور چنئی اور کولکتہ سے دو افراد کو فرضی کمپنیاں (شیل کمپنیاں) بنانے اور میول بینک اکاؤنٹس کھولنے اور انہیں چلانے میں مبینہ طورپر ملوث ہونے پر گرفتار کیا گیا ہے۔ افسر نے کہا، "یہ اکاؤنٹس مبینہ طور پر جرم سے حاصل ہونے والی تقریباً 2 کروڑ روپے کی مشکوک رقم کو ٹھکانے لگانے (منی لانڈرنگ) کے لیے استعمال کیے جا رہے تھے۔”
سی بی آئی نے حال ہی میں ایک ایسی دھوکہ دہی پر مبنی ویب سائٹ کا پتہ لگایا ہے جس کا یو آر ایل سپریم کورٹ آف انڈیا کی آفیشل ویب سائٹ سے دھوکہ دہی کی حد تک مشابہت رکھتا تھا۔ مبینہ طور پر دھوکہ بازوں نے اس فرضی رجسٹرڈ ڈومین کا استعمال ڈیجیٹل گرفتاری کے بہانے متاثرین کو دھوکہ دینے کے لیے کیا۔ سپریم کورٹ آف انڈیا کی رجسٹری سے موصول ہونے والی شکایت کی بنیاد پر، سی بی آئی نے ایف آئی آر درج کر کے معاملے کی جانچ شروع کی تھی۔
جدید فارنسک ٹولز اور تکنیکی مہارت کا فائدہ اٹھاتے ہوئے، سی بی آئی نے ہندوستان اور بیرون ملک سرگرم مجرمانہ انفراسٹرکچر کے اہم عناصر کی شناخت کی۔ جانچ سے معلوم ہوا ہے کہ مجرموں نے اپنی دھوکہ دہی کی سرگرمیوں کو درست ثابت کرنے کے لیے جعلی اور من گھڑت دستاویزات اپ لوڈ کیں، جن میں عدالتوں اور مختلف قانون نافذ کرنے والی ایجنسیوں کے جاری کردہ احکامات سے مشابہت رکھنے والے فرضی احکامات بھی شامل تھے۔
تلاشی کے دوران کئی قابل اعتراض دستاویزات، ڈیجیٹل آلات، موبائل فون اور بینک لین دین سے متعلق ریکارڈ ضبط کیے گئے۔ افسر نے کہا، "ان مواد کا تفصیلی فارنسک معائنہ اور تجزیہ کیا جا رہا ہے۔ سی بی آئی کو ایسے شواہد بھی ملے ہیں جن سے پتہ چلتا ہے کہ ہندوستانی شہریوں کے علاوہ کئی دوسرے ممالک کے شہریوں کو بھی اسی نیٹ ورک کے ذریعے دھوکہ دیا گیا ہو سکتا ہے۔ ان ممالک میں متعلقہ قانون نافذ کرنے والی ایجنسیوں کو مناسب ذرائع سے مطلع کیا جا رہا ہے۔” معاملے کی مزید جانچ جاری ہے۔
