کراکس، 22 جون (یو این آئی) وینزویلا کے دارالحکومت کراکس میں چند سیکنڈ کے وقفے سے دو طاقتور زلزلے محسوس کیے گئے۔ پہلے زلزلے کی شدت 7.2 جبکہ دوسرے کی شدت 7.5 ریکارڈ کی گئی۔
زلزلوں کے نتیجے میں متعدد عمارتیں منہدم ہو گئی ہیں اور خوفزدہ شہری گھروں سے نکل کر سڑکوں پر آ گئے۔ وزیر داخلہ دیوسدادو کابیو نے عوام سے اپیل کی ہے کہ وہ احتیاطاً اپنے گھر خالی کر دیں۔
ابتدائی اطلاعات کے مطابق بڑے پیمانے پر جان و مال کے نقصان کا خدشہ ظاہر کیا جا رہا ہے۔ امریکی جیولوجیکل سروے کے اندازے کے مطابق مرنے والوں کی تعداد 10 ہزار سے تجاوز کر سکتی ہے۔
یہ زلزلہ مقامی وقت کے مطابق شام 6 بج کر 4 منٹ پر آیا۔ اس وقت وینزویلا میں قومی تعطیل تھی، جس کے باعث بڑی تعداد میں لوگ اپنے گھروں میں موجود تھے۔زلزلے کا مرکز وینزویلا کے دارالحکومت کراکس کے مغرب میں واقع مونٹالبان علاقہ تھا، جہاں شدید جھٹکے محسوس کیے گئے اور بڑے پیمانے پر تباہی کی اطلاعات موصول ہوئی ہیں۔
امریکی وزیرِ خارجہ مارکو روبیو کا کہنا ہے کہ امریکہ فوری طور پر تلاش و بچاؤ کے کاموں میں حصہ لینے کے لیے ٹیمیں اور، طبی اور انسانی بنیادوں پر امداد وینزویلا بھجوا رہا ہے۔
سوشل میڈیا پلیٹ فارم ایکس پر جاری ایک پوسٹ میں روبیو کا کہنا تھا کہ ’ہماری ہمدردیاں اُن تمام افراد کے ساتھ ہیں جنھوں نے (اس حادثے میں) اپنے پیارے کھوئے، جو زخمی ہوئے، اور وہ بہادر امدادی کارکن جو اس کے بعد سے مسلسل کوششوں میں لگے ہوئے ہیں۔‘
اس سے قبل اُن کے نائب کرسٹوفر لینڈاو نے کہا تھا کہ امریکہ وینزویلا کے حکام کے ساتھ رابطے میں ہے اور ’امداد کو متحرک کیا جا رہا ہے۔‘
بدھ کے روز وینزویلا میں آنے والے دو بڑے زلزلوں کے بعد ملک سے مزید تصاویر سامنے آ رہی ہیں جن میں زلزلوں سے ہونے والی تباہی کے مناظر دیکھے جا سکتے ہیں۔
وینزویلا کی حکومت نے اب تک 32 افراد کی ہلاکت اور 700 سے زائد کے زخمی ہونے کی تصدیق کی ہے تاہم ہلاکتوں میں اضافے کا خدشہ ہے۔
