نارکو کوآرڈینیشن سینٹر کی 10ویں اعلیٰ سطحی میٹنگ کی صدارت کریں گے شاہ

نئی دہلی 24 جون (یو این آئی) مرکزی وزیر داخلہ امت شاہ جمعہ کو یہاں نارکو کوآرڈینیشن سینٹر کی 10ویں اعلیٰ سطحی میٹنگ کی صدارت کریں گے۔
وزارت داخلہ نے بدھ کو یہاں بتایا کہ نارکوٹکس کنٹرول بیورو کی جانب سے منعقد کی جانے والی یہ میٹنگ حکومت کے نشہ مکت بھارت کے وژن کو شرمندہ تعبیر کرنے کی کوششوں کو مزید مضبوط کرنے میں اہم کردار ادا کرے گی۔ ہائبرڈ موڈ میں ہونے والی اس میٹنگ میں 44 مرکزی وزارتوں اور محکموں کے اہم اسٹیک ہولڈرز کے ساتھ ساتھ ریاستی حکومتوں اور منشیات کے قانون نافذ کرنے والی ایجنسیوں کے 108 نمائندے شرکت کریں گے۔
اس موقع پر مرکزی وزیر داخلہ "منشیات کے کنٹرول پر وژن دستاویز (2026-2029)” جاری کریں گے۔ مرکزی حکومت کے متعلقہ محکموں، منشیات نافذ کرنے والی ایجنسیوں اور دیگر اسٹیک ہولڈرز کے ساتھ وسیع غور و خوض کے بعد تیار کی گئی یہ دستاویز منشیات کے مسئلے سے نمٹنے کے لیے مانگ کم کرنے، سپلائی کم کرنے اور نقصان کم کرنے کے پہلوؤں پر ایک مشترکہ روڈ میپ فراہم کرے گی۔ اس روڈ میپ میں نیٹ ورک پر مرکوز نفاذ کے نقطہ نظر کا تصور کیا گیا ہے۔ ساتھ ہی، اس میں اگلے تین برسوں کے دوران مصنوعی منشیات (سنتھیٹک ڈرگز) اور ڈارک نیٹ کے ذریعے ہونے والی اسمگلنگ کے چیلنجوں سے نمٹنے، نوجوانوں کو ڈرگز سے دور رکھنے، اور ڈرگز کا استعمال کرنے والوں کے لیے علاج اور بحالی کے مراکز تک رسائی بڑھانے جیسے اقدامات بھی شامل ہیں، جنہیں مربوط اور مسلسل طریقے سے نافذ کیا جائے گا۔
یہ دستاویز تمام اسٹیک ہولڈرز کی ذمہ داریوں، وقت کی حد اور اہداف کو واضح طور پر متعین کرتے ہوئے نفاذ، مانگ میں کمی، بحالی، عوامی بیداری، صلاحیت سازی اور بین ایجنسی تال میل کو یکجا کرتی ہے۔ یہ وژن دستاویز ملک بھر میں ڈرگز کے مسئلے سے نمٹنے کے لیے پالیسی بنانے، اسے نافذ کرنے اور ادارہ جاتی مضبوطی لانے کے کام میں ایک رہنما فریم ورک کے طور پر کام کرے گی۔
اس موقع پر مسٹر شاہ این سی بی کی سالانہ رپورٹ 2025 جاری کریں گے اور جموں و گوہاٹی میں نئے تعمیر شدہ این سی بی زونل دفاتر کا افتتاح کریں گے۔ ‘ڈرگ ڈسپوزل فورٹ نائٹ مہم’ منشیات کو تلف کرنے کی ایک خصوصی مہم ہے۔ اس پندرہ روزہ مہم کے دوران، ملک بھر میں مختلف مرکزی اور ریاستی قانون نافذ کرنے والی ایجنسیوں کے ذریعے قانون کے مطابق تقریباً 2,09,500 کلوگرام منشیات تلف کیے جانے کی امید ہے، جس کی مالیت 6,000 کروڑ روپے ہے۔
یہ میٹنگ ملک میں منشیات کے مسئلے سے نمٹنے کے لیے تمام متعلقہ اسٹیک ہولڈرز کی جانب سے کی جانے والی اجتماعی کوششوں کے جامع جائزے اور تشخیص کے لیے ایک پلیٹ فارم فراہم کرے گی۔ اس پروگرام کے ذریعے شریک ریاستوں، محکموں اور ایجنسیوں کو منشیات پر مؤثر کنٹرول کا ہدف حاصل کرنے کے لیے نئے جوش اور عزم کے ساتھ آگے بڑھنے میں مدد ملے گی۔ ملک میں منشیات کے مسئلے سے مؤثر طریقے سے لڑنے کے لیے "مکمل حکومتی نقطہ نظر” کی ضرورت پر زور دیتے ہوئے، اس اعلیٰ سطحی میٹنگ میں آئندہ تین برسوں میں ملک بھر میں منشیات کی اسمگلنگ اور منشیات کے غلط استعمال سے مؤثر طریقے سے نمٹنے سے متعلق اہم امور پر غور و خوض کیاجائیگا۔