افغانستان میں سرمایہ کاری کے امکانات تلاش کرے گا ہندوستانی تاجروں کا وفد

نئی دہلی، 24 جون (یو این آئی) ہندوستان اور افغانستان کے درمیان تجارتی تعلقات کو مضبوط کرنے اور سرمایہ کاری کے نئے مواقع تلاش کرنے کے لیے ہندوستانی تاجروں اور سرمایہ کاروں کا ایک 20 رکنی وفد جلد ہی افغانستان کا دورہ کرے گا۔
‘پی ایچ ڈی چیمبر آف کامرس اینڈ انڈسٹری’ (پی ایچ ڈی سی سی آئی) کے صدر سنتوش جوشی نے بدھ کو یہاں اس بات کا اعلان کیا۔ یہ اعلان ہندوستان کے سرکاری دورے پر آئے ‘افغانستان چیمبر آف کامرس اینڈ انویسٹمنٹ’ (اے سی سی آئی) کے ڈائریکٹر جنرل سید کریم ہاشمی کے ساتھ ہوئی ایک اعلیٰ سطحی میٹنگ کے بعد کیا گیا۔ یہاں ‘افغانستان-ہندوستان کے درمیان تجارتی مواقع’ کے موضوع پر منعقدہ اس خصوصی میٹنگ کا بنیادی مقصد دونوں ممالک کے درمیان نجی شعبے کے کاروباری تعلقات کو بڑھانا، مشترکہ سرمایہ کاری کو تیز کرنا اور نئے اقتصادی راستوں کو تلاش کرنا تھا۔
دہلی میں ہوئی اس میٹنگ کے دوران افغان وفد کے سربراہ سید کریم ہاشمی نے کہا کہ ہندوستان اور افغانستان کے درمیان صدیوں پرانے تاریخی، ثقافتی اور دوستانہ تعلقات رہے ہیں، جو دونوں ممالک کے درمیان ایک مضبوط اقتصادی تعاون کی ٹھوس بنیاد بن سکتے ہیں۔ انہوں نے کہا کہ تجارت صرف اشیاء کے لین دین تک محدود نہیں ہے بلکہ یہ بڑے پیمانے پر روزگار کی فراہمی، اقتصادی ترقی، عوامی بہبود اور ممالک کے درمیان باہمی تعلقات کو گہرا کرنے کا ایک بہترین ذریعہ ہے۔
مسٹر ہاشمی نے زراعت، کان کنی، قالین، دستکاری، خشک میوہ جات، زعفران، قیمتی پتھروں اور سنگ مرمر جیسے شعبوں میں افغانستان کی مضبوط تجارتی صلاحیتوں کا ذکر کیا۔ اس کے ساتھ ہی انہوں نے صنعت، ٹیکنالوجی، فارماسیوٹیکلز، مشینری اور مینوفیکچرنگ کے شعبے میں ہندوستان کی عالمی طاقت کی تعریف کی۔ انہوں نے اس بات پر زور دیا کہ دونوں ممالک کو اب روایتی درآمدات و برآمدات سے آگے بڑھ کر مشترکہ منصوبوں، ٹیکنالوجی کی منتقلی، افرادی قوت کی ترقی اور صنعتی تعاون پر توجہ مرکوز کرنی چاہیے۔
میٹنگ کے دوران مسٹر ہاشمی نے ہندوستانی تجارتی نمائندوں کو افغانستان کے اقتصادی اور کاروباری ماحول کو قریب سے دیکھنے اور سمجھنے کے لیے ملک کا دورہ کرنے کی باضابطہ دعوت دی۔ اس موقع پرہندوستان میں موجود افغانستان کے سفیر مفتی نور احمد نور نے بھی اقتصادی تعاون کو وسعت دینے پر زور دیا۔ انہوں نے یقین دلایا کہ دہلی میں واقع افغان سفارت خانہ دونوں ممالک کی تجارتی برادریوں کے درمیان رابطے اور سفارتی کڑیوں کو آسان بنانے میں اپنا پورا تعاون جاری رکھے گا۔
افغان وفد کا خیرمقدم کرتے ہوئے پی ایچ ڈی سی سی آئی کے صدر سنتوش جوشی نے کہا کہ ان کا چیمبر فارماسیوٹیکلز، لاجسٹکس، کارگو خدمات، صنعتی پیداوار اور سرمایہ کاری جیسے شعبوں میں افغانستان کے ساتھ تعاون کے لیے پوری طرح تیار ہے۔ اسی سلسلے میں انہوں نے ہندوستانی سرمایہ کاروں کے جلد ہی افغانستان کے دورے پر جانے کا اعلان کیا۔
میٹنگ میں دونوں فریقین نے مستقبل میں بھی اس سفارتی اور کاروباری مکالمے کو برقرار رکھنے اور نجی شعبے کے تعلقات کو مزید مضبوط کرنے کے عزم کا اعادہ کیا۔