نئی دہلی، 18 جون (یو این آئی): طویل وقفے کے بعد ہندوستانی ون ڈے ٹیم میں واپسی کرنے والے وکٹ کیپر بلے باز ایشان کشن نے کہا ہے کہ دوبارہ قومی جرسی پہننا ان کے لیے باعثِ فخر ہے اور وہ اپنی کارکردگی کے ذریعے ہندوستان کو مزید میچ جتوانا چاہتے ہیں۔
لکھنؤ میں افغانستان کے خلاف دوسرے ون ڈے میں ایشان کشن نے صرف 79 گیندوں پر 125 رنز کی جارحانہ اننگز کھیلی، جبکہ کپتان شبھمن گل نے 154 رنز بنائے۔ دونوں نے تیسری وکٹ کے لیے 224 رنز کی شراکت قائم کر کے ہندوستان کو 402 رنز کے بڑے اسکور تک پہنچایا، جس کے بعد میزبان ٹیم نے 170 رنز سے کامیابی حاصل کرتے ہوئے سیریز 0-2 سے اپنے نام کر لی۔
میچ کے بعد ایشان کشن نے کہا، ’’کافی عرصے بعد ہندوستانی جرسی پہننا میرے لیے انتہائی فخر کی بات ہے۔ اس باصلاحیت اور متوازن ٹیم کا حصہ بن کر خوشی محسوس ہو رہی ہے اور میری کوشش ہے کہ اپنی کارکردگی سے ہندوستان کو مزید کامیابیاں دلاؤں۔‘‘
انہوں نے کہا کہ ایک کھلاڑی کے طور پر سیکھنے اور بہتر ہونے کا عمل کبھی ختم نہیں ہوتا اور وہ ہر موقع پر ٹیم کے لیے بہترین کردار ادا کرنا چاہتے ہیں۔
دریں اثنا، نوجوان فاسٹ بولر گُرنور براڑ نے اپنی کامیابی کا سہرا فرسٹ کلاس کرکٹ اور انڈیا اے کے تجربے کو دیا۔ افغانستان کے خلاف دوسرے ون ڈے میں 60 رنز دے کر تین وکٹیں لینے والے گُرنور نے کہا کہ ان کی توجہ اپنی طاقت، رفتار اور درست لینتھ پر قائم رہنے پر ہے۔
انہوں نے کہا کہ بین الاقوامی کرکٹ میں کامیابی صرف رفتار سے نہیں بلکہ بہتر منصوبہ بندی، فیلڈ سیٹنگ اور میچ کی صورتحال کے مطابق حکمتِ عملی اپنانے سے ملتی ہے۔ گُرنور نے اس عزم کا اظہار بھی کیا کہ وہ مستقبل میں مزید بہتر کارکردگی دکھا کر ٹیم انڈیا کے لیے زیادہ سے زیادہ کردار ادا کرنا چاہتے ہیں۔
تین میچوں کی سیریز پہلے ہی ہندوستان کے نام ہو چکی ہے، جبکہ آخری ون ڈے ہفتہ کو چنئی کے چیپاک اسٹیڈیم میں کھیلا جائے گا، جہاں افغانستان اپنی ساکھ بچانے کی کوشش کرے گا۔
