شمالی کمان کے سربراہ کا پہلگام اور چندن واڑی کا دورہ‘/’فوج محفوظ اور پُرامن یاترا کو یقینی بنانے کے لیے پُرعزم ہے‘
آئی جی پی کشمیر نے بھی یاترا کیلئے سکیورٹی اقدامات کا جائزہ لیا ‘وضع کردہ ایس او پیز کا نفاذ یقینی بنانے کی ہدایت
مشرق خبر
سرینگر؍۱۸جون
شمالی کمان کے سربراہ لیفٹیننٹ جنرل پرتیک شرما نے جمعرات کو کشمیر میں سالانہ شری امرناتھ یاترا کے جنوبی راستے پر سیکورٹی صورتحال اور آپریشنل تیاریوں کا جائزہ لیا۔
واضح رہے کہ۴۰ روزہ سالانہ امرناتھ یاترا ؍۳ جولائی سے پہلگام اور بالتل کے دو روایتی راستوں سے شروع ہوگی۔
فوج کی شمالی کمان کی جانب سے سوشل میڈیا پلیٹ فارم ایکس پر جاری بیان میں کہا گیا کہ لیفٹیننٹ جنرل پرتیک شرما نے پہلگام اور چندن واڑی کا دورہ کر کے شری امرناتھ جی یاترا۲۰۲۶کے آغاز سے قبل سیکورٹی صورتحال اور آپریشنل تیاریوں کا جائزہ لیا۔
بیان میں کہا گیا کہ فوج تمام متعلقہ اداروں کے ساتھ قریبی رابطہ، مؤثر سیکورٹی اقدامات اور جامع تیاریوں کے ذریعے تمام یاتریوں کے لیے محفوظ اور پُرامن یاترا کو یقینی بنانے کے لیے پُرعزم ہے۔
دریں اثنا، انسپکٹر جنرل آف پولیس (آئی جی پی) کشمیر وی کے بردی نے نیٹ یو جی۲۰۲۶کے دوبارہ امتحان اور شری امرناتھ جی یاترا کے سلسلے میں سیکورٹی انتظامات اور تیاریوں کا جائزہ لینے کے لیے ایک اعلیٰ سطحی اجلاس کی صدارت کی۔
شری امرناتھ یاترا۲۰۲۶ کے حوالے سے آئی جی پی کشمیر نے تمام ایس او پیز پر مکمل عمل درآمد کو یقینی بنانے اور سیکورٹی ایجنسیوں کے درمیان مربوط رابطہ برقرار رکھنے کی ضرورت پر زور دیا۔
بردی نے تمام ضلعی ایس ایس پیز کو ہدایت دی کہ وہ یاترا کے سیکورٹی انتظامات کی ذاتی طور پر نگرانی کریں اور یاترا قافلوں کی فول پروف سیکورٹی کے لیے مؤثر نفری کی تعیناتی اور حقیقی وقت کی نگرانی کو یقینی بنائیں تاکہ یاترا کا انعقاد محفوظ اور پُرامن ماحول میں ممکن بنایا جا سکے۔
اجلاس میں آئی جی پی ٹریفک، کشمیر زون کے تمام رینج ڈی آئی جیز، ڈی آئی جی ٹریفک، ایس ایس پی پی سی آر کشمیر، آئی جی پی کشمیر کے اسٹاف آفیسر، کشمیر زون کے تمام ضلعی ایس ایس پیز اور دیگر سینئر افسران نے شرکت کی۔
اجلاس کے دوران آئی جی پی کشمیر نے معیاری عملی طریقہ کار (ایس او پیز) پر سختی سے عمل درآمد کی ہدایت دیتے ہوئے کہا کہ امتحانی مراکز پر مضبوط سیکورٹی انتظامات کو یقینی بنایا جائے۔ انہوں نے امتحانی مراکز پر مناسب پولیس نفری کی تعیناتی، رسائی کے مؤثر کنٹرول، ہجوم کے نظم و نسق اور امن و قانون کی صورتحال برقرار رکھنے پر زور دیا۔
بردی نے ہدایت دی کہ امتحانی مراکز کے داخلی راستوں پر امیدواروں کی سخت تلاشی اور شناختی جانچ امتحانی حکام کے اشتراک سے عمل میں لائی جائے۔
آئی جی پی کشمیر نے افسران کو امتحانی مواد کی محفوظ ترسیل، حفاظت اور نگرانی یقینی بنانے کے ساتھ ساتھ سول انتظامیہ اور دیگر متعلقہ اداروں کے ساتھ قریبی رابطہ برقرار رکھنے کی ہدایت دی۔
ٹریفک انتظامات کا جائزہ لیتے ہوئے انہوں نے امتحان کے دن امیدواروں کی آمد و رفت کو آسان بنانے اور امتحانی مراکز کے اطراف ٹریفک جام سے بچنے کے لیے مؤثر اقدامات کرنے پر زور دیا۔
بردی نے تمام افسران کو پیشہ ورانہ طرزِ عمل، عوام دوست پولیسنگ اور تمام متعلقہ اداروں کے درمیان بہتر رابطہ کاری برقرار رکھنے کی ہدایت دی تاکہ امتحان محفوظ، پُرامن اور شفاف ماحول میں منعقد ہو سکے۔
