؍۲۵۱افسران کے تبادلے‘ آپریشنل استعداد بڑھانے اقدامات
ایجنسیز
سرینگر؍۱۷جون
جموں کشمیر پولیس میں حالیہ مہینوں کے دوران انسپکٹر سطح پر سب سے بڑے تبادلوں میں سے ایک کے تحت ۲۵۱ ؍ انسپکٹروں کے تبادلے اور نئی تعیناتیاں عمل میں لائی گئی ہیں۔
یہ احکامات ڈائریکٹر جنرل آف پولیس نلین پربھات کی جانب سے جاری کیے گئے ہیں، جن کا مقصد پولیس فورس کی آپریشنل کارکردگی کو مزید مضبوط بنانا اور یونین ٹیریٹری میں افرادی قوت کی مؤثر تقسیم کو یقینی بنانا ہے۔
پولیس ہیڈکوارٹر سرینگر سے۱۶جون۲۰۲۶ کو جاری کردہ ایک آرڈرکے مطابق یہ تبادلے جموں زون، کشمیر زون، سی آئی ڈی، کرائم برانچ، ٹریفک پولیس، سیکورٹی ونگ، گورنمنٹ ریلوے پولیس(جی آر پی)‘آرمڈ پولیس اور پولیس تربیتی اداروں میں خدمات انجام دینے والے افسران پر مشتمل ہیں۔
اہم تبادلوں میں شام لال کو جموں زون سے۷ جموں و کشمیر آرمڈ پولیس منتقل کیا گیا ہے، جبکہ منوہر لال کو جی آر پی میں تعینات کیا گیا ہے۔ شکیل احمد اور محمد الیاس کو بھی جموں زون سے۷ جے کے اے پی منتقل کیا گیا ہے۔
اسی طرح جیت سنگھ کو سی آئی ڈی، دلراج سنگھ دلبر کو کشمیر زون، نذیر احمد کو ٹریفک ونگ، راجیش جسروٹیا کو سی آئی ڈی، اجیت سنگھ کو کرائم برانچ، کانچن بالا کو۷ جے کے اے پی اور پدم دیو سنگھ کو۴ جے کے اے پی میں تعینات کیا گیا ہے۔
حکم نامے کے مطابق کشمیر زون سے بھی متعدد افسران کو سی آئی ڈی، کرائم برانچ، ٹریفک، سیکورٹی، جی آر پی اور آرمڈ پولیس یونٹس میں منتقل کیا گیا ہے، جبکہ خصوصی ونگز میں تعینات کئی افسران کو دوبارہ جموں اور کشمیر زون میں تعینات کیا گیا ہے تاکہ زمینی سطح پر پولیسنگ اور تفتیشی صلاحیتوں کو مزید مضبوط بنایا جا سکے۔
پولیس تربیتی اداروں سے وابستہ متعدد انسپکٹر رینک افسران کے تبادلے بھی اس وسیع انتظامی رد و بدل کا حصہ ہیں۔ پون سنگھ کو جموں زون سے پی ٹی ٹی آئی وجے پور، انیل رائنا کو ٹریفک ونگ سے پی ٹی ایس کٹھوعہ، سجاد احمد کو آرمڈ زون سے سی ٹی سی لیتھ پورہ جبکہ رنجیت سنگھ اور سدھارتھ پنڈت کو ایس ٹی سی تلوارہ تعینات کیا گیا ہے۔
حکم نامے میں مزید کہا گیا ہے کہ آرمڈ زون سے جی آر پی میں تعینات انسپکٹر محمد انظر خان کو موجودہ ذمہ داریوں سے سبکدوش کرکے فوری طور پر دوبارہ آرمڈ زون میں منتقل کیا گیا ہے۔
پولیس ہیڈکوارٹر نے حالیہ تبادلوں کے بعد آرمڈ زون، جموں زون، کشمیر زون اور سی آئی ڈی میں متعدد انسپکٹر عہدے بھی بحال کیے ہیں تاکہ مختلف یونٹوں میں افرادی قوت کا توازن برقرار رکھا جا سکے۔
تمام متعلقہ افسران کو ہدایت دی گئی ہے کہ وہ فوری طور پر اپنی موجودہ تعیناتیوں سے فارغ ہو کر نئی جائے تعیناتی پر رپورٹ کریں۔
پولیس حکام کے مطابق اس بڑے پیمانے کے انتظامی رد و بدل سے پولیسنگ کے نظام میں مزید بہتری آئے گی، خصوصی یونٹوں کی استعداد میں اضافہ ہوگا اور جموں و کشمیر بھر میں مجموعی آپریشنل کارکردگی کو مزید تقویت ملے گی۔
