ہنگامی طبی امداد، آکسیجن اور ریسکیو سہولیات کیلئے تعیناتی عمل میں لائی جائیگی
ایجنسیز
سرینگر؍۱۷جون
مرکزی ریزرو پولیس فورس (سی آر پی ایف) نے آئندہ شری امرناتھ یاترا کے دوران بالتل روٹ پر یاتریوں کی ہنگامی امداد اور بچاؤ کے لیے اپنی خصوصی ماؤنٹین ریسکیو ٹیم(ایم آر ٹی) تیار کر لی ہے۔
۳۰؍ اہلکاروں پر مشتمل اس خصوصی ٹیم کو آکسیجن سلنڈرز، پورٹیبل اسٹریچرز، رسیاں، بلندی پر ہونے والی بیماریوں کے علاج کے لیے ادویات، پینے کا پانی اور دیگر ضروری طبی و امدادی سامان سے لیس کیا گیا ہے۔
سی آر پی ایف کے ڈپٹی انسپکٹر جنرل (ڈی آئی جی) اور یاترا کے نوڈل افسر سدھیر کمار نے پی ٹی آئی کو بتایا کہ یہ ٹیمیں بالتل روٹ پر اہم مقامات پر تعینات کی جائیں گی اور ان یاتریوں کی مدد کریں گی جنہیں تھکاوٹ، چوٹ یا دیگر طبی مسائل کی وجہ سے فوری امداد کی ضرورت پیش آئے گی۔
کمار نے کہا کہ یہ ٹیمیں بنیادی طبی سہولیات فراہم کرنے کے ساتھ ساتھ دیگر امدادی اور ریسکیو ایجنسیوں کی بھی مدد کریں گی، خاص طور پر اگر راستے میں لینڈ سلائیڈنگ یا اچانک سیلاب جیسی صورتحال پیدا ہو جائے۔
سدھیر کمار، جو تیسری مرتبہ امرناتھ یاترا کے انتظامات سے وابستہ ہیں، نے کہا کہ گزشتہ سال سے سی آر پی ایف کی ماؤنٹین ریسکیو ٹیمیں بالتل روٹ پر مستقل طور پر خدمات انجام دے رہی ہیں اور یاتریوں سمیت یاترا کے انتظامات میں مصروف افراد کو آکسیجن اور دیگر ضروری امدادی سہولیات فراہم کرتی رہی ہیں۔
ایک سینئر افسر کے مطابق سی آر پی ایف کی یہ خصوصی ٹیمیں جمعرات کو سرینگر سے باضابطہ طور پر روانہ کی جائیں گی تاکہ انہیں یاترا روٹ پر تعینات کیا جا سکے۔
واضح رہے کہ۳۸۸۰میٹر کی بلندی پر واقع مقدس امرناتھ غار کی۵۷ روزہ سالانہ یاترا۳؍ جولائی سے شروع ہوگی۔
یاتری روایتی۴۸ کلومیٹر طویل ننون،پہلگام راستے اور گاندربل ضلع کے نسبتاً مختصر لیکن دشوار گزار۱۴ کلومیٹر طویل بالتل راستے کے ذریعے مقدس غار تک پہنچتے ہیں۔یاترا کی سیکورٹی کے لیے اس سال جموں و کشمیر پولیس کے علاوہ مرکزی مسلح پولیس فورسز کی۶۷۰کمپنیاں تعینات کی جا رہی ہیں۔
گزشتہ سال سالانہ یاترا کے دوران۵۸۱ سی اے پی ایف کمپنیاں تعینات کی گئی تھیں، تاہم حکام کے مطابق۲۰۲۵ کے پہلگام حملے کے بعد موجودہ سیکورٹی خدشات کے پیش نظر اس سال فورسز کی تعداد میں نمایاں اضافہ کیا گیا ہے۔
واضح رہے کہ سی اے پی ایف کی ہر کمپنی میں عموماً۷۲ سے۷۵؍اہلکار شامل ہوتے ہیں۔
۔۔۔۔۔
