ایشین گیمز میں بمراہ کی واپسی ہوگی

ممبئی، 6 جون (یو این آئی): انگلینڈ اور آئرلینڈ کے خلاف ٹی-20 سیریز کے علاوہ شریس ایّر ایشین گیمز میں بھی ہندوستانی ٹیم کی کپتانی کریں گے۔ آئی پی ایل 2026 کے بعد یہ پہلی بار ہوگا جب جسپریت بمراہ ٹیم کے ساتھ جڑیں گے۔ اس سے پہلے وہ ہندوستانی ٹیم کے ساتھ آئرلینڈ اور انگلینڈ نہیں جائیں گے۔ اس ٹورنامنٹ میں بھی تلک ورما کو نائب کپتان بنایا گیا ہے اور ویبھو سوریا ونشی کو ٹیم میں شامل کیا گیا ہے۔
جاپان کے آئیچی پریفیکچر میں 2026 ایشین گیمز 19 ستمبر سے 4 اکتوبر تک منعقد ہوں گے۔ اس کا شیڈول ویسٹ انڈیز کے خلاف ہندوستان کی تین میچوں کی ون ڈے سیریز سے ٹکرا رہا ہے، جو 27 ستمبر سے 3 اکتوبر کے درمیان کھیلی جائے گی۔ اس کے بعد 6 اکتوبر سے پانچ ٹی-20 میچوں کی سیریز ہوگی۔
ایشین گیمز کا مردوں کا کرکٹ مقابلہ ٹی-20 فارمیٹ میں کھیلا جائے گا اور 24 ستمبر سے شروع ہوگا۔ فائنل 3 اکتوبر کو کھیلا جائے گا۔ سونے کے تمغے (گولڈ میڈل) کے لیے ہندوستان، پاکستان، بنگلہ دیش، سری لنکا، افغانستان، جاپان، نیپال، ملائیشیا، ہانگ کانگ اور عمان سمیت 10 ٹیمیں مقابلہ کریں گی۔
ٹورنامنٹ کا آغاز 24 سے 26 ستمبر کے درمیان کوالیفائر مقابلوں سے ہوگا۔ اس کے بعد 28 اور 29 ستمبر کو کوارٹر فائنل کھیلے جائیں گے۔ سیمی فائنل ایک اکتوبر کو ہوں گے، جبکہ کانسہ اور سونے کے تمغے کے مقابلے 3 اکتوبر کو منعقد کیے جائیں گے۔
ہندوستان نے اکتوبر 2023 میں چین کے ہانگژو میں ہوئے پچھلے ایشین گیمز میں مردوں کے زمرے کا گولڈ میڈل جیتا تھا۔ افغانستان کے خلاف فائنل 18.2 اوورز کے بعد بارش کی وجہ سے منسوخ ہو گیا تھا، جس کے بعد اعلیٰ درجہ بندی (ہائی رینکنگ) والی ٹیم ہونے کے سبب ہندوستان کو فاتح قرار دیا گیا تھا۔
2026 ایشین گیمز کا خواتین کا کرکٹ مقابلہ 17 سے 22 ستمبر کے درمیان کھیلا جائے گا۔ گولڈ میڈل کے لیے بنگلہ دیش، ہندوستان، پاکستان، سری لنکا، جاپان، تھائی لینڈ، ملائیشیا اور چین کی ٹیمیں چیلنج پیش کریں گی۔ ہندوستان نے 2023 ایشین گیمز میں خواتین کے کرکٹ کا بھی گولڈ میڈل جیتا تھا۔ ٹیم نے فائنل میں سری لنکا کو 19 رن سے ہرایا تھا۔
ایشین گیمز کے لیے ہندوستانی ٹیم: شریس ایّر (کپتان)، ابھشیک شرما، ویبھو سوریا ونشی، سنجو سیمسن، ایشان کشن، شیوم دوبے، تلک ورما (نائب کپتان)، نتیش ریڈی، اکشر پٹیل، واشنگٹن سندر، ورون چکرورتی، روی بشنوئی، ہرشیت رانا، ارشدیپ سنگھ، جسپریت بمراہ۔